Ibai yimya ka dangbo masü

Anungji Tsüngremi mapang tetemsü nung uludaktsütsü asoshi nenoki nenok sasa Pa tashi taitba teka kübok ajemalua kümang. 1 Peter 5:6
Tashi tait Tsüngrem tekai teti Pa tematiba sentong ataloktsür. Asenok tatidang ajanga oaka Pa teka agi asenok anir. Khristan ka ama, asenoki ajemalua Tsüngrem kübok alitsüla. Ibaji yimya masü. Asenoki timtem maginer, aser asenok sasa uluner aser nisung nungi nisung nüngsang aginer. Saka asenoki nisung nungi nüngsang masü Tsüngrem mulung südaktsütsü bushitsüla kechiaser asenok timtem ajanga temoatsü bener arütsübaji nisungi masü, Tsüngremi bener arutsür. Asenoki asen sasa ulura tila akümtsü, saka asenoki asen sasa tila kümra idangji Tsüngremi asenok ulutsütsü ta Yisui asenok dang tekümdangtsü ashi.
Yisui Pasasa ajemalua oda tasütsüa tonga tashi angabaji (Fil. 2:8) asenok asoshi tatishitsü tulutiba lir. Ibaji ajanga Tsüngremi Pa kanga ulutsü (t.9). Asenokia asenok sasa tashi angaa asenok sasa ajemalutsüla. Asenoki aji koda inyaktsü? Yisui ashi, “Ne sasa azüokang” (Luke 9:24). Pai ashi, “Pei ama ne kiyonger meimang” (Mk. 12:31). Pauli Filipi nunger dang parnok dang nungi tangar tali züngshiang ta ashi (Fil. 2:2). Yimya nisung ka asoshi ibaji temela masü, saka asenok Khristantem Tanela Temeshi-i yarir. Tsüngremi asenok ulutsütsü, saka Pai pa mapang nung aji inyaktsü ta asenoki bilemtettsüla.
Oba, Nai ni shimtetba asoshi Ne tenüng asanger. Na aser Tanela Temeshi teyari ajanga mapa tasak ajak temela kümdaktsür. Amen.