Ibobi-i framework agreement atema PM Modi dak amangtsüla: Javadekar

Imphal, February 26 (Agencies) : PM Narendra Modi-i framework agreement ajanga Manipur litsü mekongshitsü ta jangjajangja metetdaktsüogo, anungji CM Ibobi Singh-i agreement nung aliba asüngdangtsü onük madoker, ta Union HRD minister, Prakash Javadekar-i tanü metetdaktsü.
“Pakistan nung kiralongartem anema Army-i amakba dak nai tamang katetba amaji, nai nür Prime Minister daka tamang akatsüla. PM-i jangjajangja metetdaktsüogo anungji Ibobi-i agreement atema tanaben asüngdangtsü nüngdak madoker” ta Javadekar-i ashi.
Honibarnü Imphal nung BJP rally ka nung jembidang Modi-i framework agreement nung Manipur dak sendakba kecha mali ta metetdaktsüba sülen Ibobi-i iba agreement ya yimjak nung metetdaktsütsüla ta takhangba agütsü.
PM-i framework agreement nungi sign mesütepdang AICC president den tamasa iba onük lemsatepa liasü, ta Javadekar-isa metetdaktsü.
Ano külen paisa ashiba agi, PM Modi-i Ibobi Singh’er Congress dak tai tongloktsüba atema parnoki telangzüba kecha magütsütettsü.
Manipur state sorkari rongsenkettsüng mokdang ayonger den külemi yariteper aser tesüiba küm 15 tashi sorkar inyaka arudang kecha meinyak, ta yashi Modi-i Manipur nung Congress sorkar aitsü.
“BJP-i sorkar kümra, mokdangba anendaktsütsü” ta Modi-i jembiba pusema Javadekar-i ashiba agi, linük indang inyakyim nung state sorkari masüngdang tashibo Centre-i law & order onük nung tebang aittsü makok.
Javadekar-isa Manipur nung ochimashi mapa kanga bulua inyakba, tzü tajemtsü peria manguba aser tesüiba küm 15 tsüngda Congress sorkari tamakok anguba onüktem lepshia jembi.