Ibobi Singh kinungtsüi lar jabaso nem lenmang lapoktsür

Imphal, January 10 (Agencies): Manipur CM Okram Ibobi Singh kinungtsüi Thoubal district kübok Khangabok assembly constituency nung tanaben election nung metokteptsü saka lar jabaso ka dang aliba, Okram Surajkumar (Kennedy)-i tokteptsü.
Election mezüngbuba shilem March 4 nung agitsü aliba Thoubal district kübok Chief Minister Okram Ibobi’er ki lir. Tetsü Okram Landhoni melena küm 29 tain Surajkumar Khangabok constituency nungi aitsü asoshi Manipur nung aliba Congress telok ajanga melaogo.
“Ni menden nungi alutsü, kechiyong Manipur-i lanur tashi nüngdaker,” ta Landhoni-i osangbener dang shia liasü. 2017 küm Manipur nung election agitsü aliba nung Surajkumar ya tanubosang asütsü südi. State BJP vice-president Jadumani ajanga Surajkumar den tokteptsü nübu shimtsü.
London nung Kingston University nungi economics nung graduate sür alisang Surajkumar yagi polo kanga junga asayar aser state-level badminton champion lir. Pa kibong kümer aser jabaso ka lir.
Tesü tashi pai politics nung tejangraba maliasü, ta ashi. “Politics ji kü tsüraburi amokbanga lir, saka Khangabok nung teküpok tia nung aliba nüburtem timtemba ngua teyari teka agütsütsü asoshi ni molungtet,” ta pai osangbener dang shia liasü.
“Manipur nung tera tonga yia ochimashi aliba ya lanurtemi melenshitettsü. Nüburtemi nüngdakba mapang pai yariba, tzümetsüng ajanga timtema alirtem yariba aser lanurtem lenmang balala nung ajungmesoba ajanga pa Congress telok nung jenjang tajung mesemtetogo,” ta Surajkumar-isa shisem.
“Kü nem maongka agütsüra, ni azüngba tesem nung terenlok aliba ama ni Manipur nung terenlok bener arutsü,” ta paisa shisem.
Manipur nung Ibobi Singh-i aniba Congress teloki kümsük pezübuba sorkar abentsü teimla lir.