Ibrahim Mohamed Solih Maldives tir akümba sangdongogo

Maldives, Rongjui/September 29 (Agencies): Maldives nung tir menden atema election agiba nung ajak aoksadakja Common opposition candidate Ibrahim Mohamed Solih-i taoba hopta takok anguba sülen pa Tir asütsü Küptoknü sangdongogo, election authority-i ashiba agi, Abdulla Yameen-i tamakok anguba sülen tatembangbuba osang sangdongtsü asoshi tetsükdaktsü aliba ajanga osang agütsütsü monu.
Ibrahim Mohamed Solih-i tir election shilem 58.4 (vote 134,705) agi akok, ta election commission chief Ahmed Shareef-i jangjashitsü.
Commissio-i “interim results”bo Tentonü sangdongogo saka vote agütsüba dak sendakba nung okadak ken o benokba tem bentettsü asoshi Rongjui/Sept 23 nü agiba election result mesangdongi liasü.
“Tamendakdak makaba ken o benokba sülen election result sangdongtsüba dak sendakba nung onok amokmerena liasü,” ta Shareef-i Küptoknü Male nung ashi.
“Tashishiba 400 dak tema liasü saka election result melenshitsüsa item ken o ka danga shidak masü asü,” ta paisa ashi.
Taoba tir Yameen, shibai küm pongu yimsü asüba mapang nung pa den tokteper timba ka linük nungi mindok mesera tepuokdak ayu, pai vote 96,502 dang angu, ta Shareef-i ashi.
Yameen pusemer aikati parnok vote magütsüdaktsüi nokdang, ta ashishia liasü.
Ajisüaka official results ajanga sayuba agi, vote agütsütsü temsüa alir nisung 262,135 nungi shilem 90-ibo vote agütsüogo.
Solih nem opposition party 4-i teyari agüja liasü aser item rongnungi party asemibo 2013 küm Mohamed Nasheed yaria liasü.
Yameen term tembangba sülen Yimpoksüi/Nov 17 nü Solih tir menden atema tenangzüktepba agitsü.
Tsüklai/Feb nung pa menden nungi agintsü meranger ta temulung melemi bilemba sülen Yameen-i emergency declare asü aser obendanger tongtitem aser yimden yimsüsüba tsütsü pa anemertem apu.
Taoba hopta tamakok anguba sülen Yameen-i political prisoner pongu chiokogo, saka pa adianu Maumoon Abdul Gayoom densema tangar aika tia mejangjai lir.
Election nung tamakok nguaka Yameen maneni par party telokakba asütsü shimogo.