Ibrahimovic-i Paris Saint-Germain telok toktsütsü lemteter

Paris, May 13 (Agencies): Sweden nunger football asayar, Zlatan Ibrahimovic-i France nung tentetba Paris Saint-Germain (PSG) football telok toktsütsü lemtetba osang ka tanü, Hokolbar nü sangoktsüogo.
“Ni asüng, Honibar nü Parc des Princes nung ozü PSG telok tenüng nung shilem agiba sülenbo PSG telok toktsütsü lemtetogo,” ta PSG telok striker, arishi küm 34 tain Ibrahimovic-i ashi.
PSG tenüng nung asayatsü asoshi agiba tezüngzüktep taruba June ita 30 nü tembangtsü alisang, Ibrahimovic-i Nantes telok den asüng tatembangsüa Ligue 1 asayamong asaya nung shilem agitsü renema lir.
Iba asayaji par PSG telok tenüng nung tatembangba asaya asütsütsü asoshi renemaka, Ibrahimovic-i tan May ita 21 nüa PSG telok tenüng nung French Cup final nung shilem agitsü renemba osang angazükogo.
“PSG aser Ibrahimovic’er ketdangser nati senden mena o lemtepba sülen Ibrahimovic-i benokba PSG telok toktsütsü onük agizüktsü bangjemogo,” ta PSG telokia osang jangjashitsü.
“Ibrahimovic-i football asayatsüren toktsüba sülen maneni PSG telok ketdangser ka ama shilem agitsü nangzüktepogo,” ta par teloki shisem.
Taoba hopta otsüsütsüsa France’er Player of the Year sempet tasembenbuba agizüksang, Ibrahimovic-i 2012 küm nungi tenzüka PSG telok tenüng nung 178 ben tashi asayadang ajak agi goal 152 tashi agütsüba osang bushiteta lir.