IBS kaketshirtem nem AKM aser MTBA-i teyari agütsü

Dimapur, Rongchii/April 22 (TYO): Impur Bible School nung students kin ter dak tema nungi atenshia, 2020 küm Academic session tenzüka aodang, tia maka Covid-19 ajanga alima tensa denkülemi Impur Bible School nunga class magitettsüsa aküm. Students makamait ajanga pei pei kidangi motettsüsa akümba den, tanurtemji Naga kintem nungi dang masü, saka Myanmar, Assam aser Arunachal nungia students aika dang arua alinung, parnok senzüsenbong dang tashitak menatsü jenbua mali ta bilema, onok jembiteper, class magiaka, hostel nung tesayurtemi parnok anebalua arudar.
Aji oda hostel nung Sponsors aser kinungertem nungi sen-o-tsü teyari angutsü lenmang mesüa alidang, Ao Kaketshir Mungdang (AKM) ajanga students ajak atema sapon-totzü (toiletries) teperi 14.04.2020 nung angati bener arutsü. Ano iba den 21.04.2020 nü Mokokchung Town Baptist Arogo (MTBA) ajanga jang aser aonsotsü aika bener arua tenla agütsü. Aji oda shisabulua aliba mapang ka nung teyari tulu agütsüba atema AKM aser MTBA dang kanga pelaba asen Aortem ajak den lemsateper.
Ano iba den Impur Bible school kaketshirtem aser inyakertem asoshi sarasademtsüba angashia nenok ajak dang pelar aser nenok ajak atema maneni sarasademtsürdar, ta IBS Headmaster Rev. Toshi Longchar-i sangdong ka ajanga metetdaktsü.