ICAI-i Arunachal CM nem tetushi agütsü

Itanagar, July 02 (Agencies): Honibarnü 68buba Chartered Accountants anogomung nung Institute of Chartered Accountants of India (ICAI)-i Arunachal Pradesh Chief Minister, Pema Khandu nem tetushi agütsü. Iba sentong nungsa GST indang sentong repsema agi.
ICAI-isa State BJP Tir, Tapir Gao aser Advisor to CM, Tai Tagak na nema tetushi agüja liasü.
Iba sentong nung jembidang Chief Minister-i, Centre nung sorkar balalai meranga inyakba ajanga GST ya atangji nung atalokogo, ajisüaka Narendra Modi lenisüba tashi aitba ajanga dang iba ya takok ngua atalok, ta ashi.
Paisa, linük nung GST ajanga sorkar inyakyim tajungba akumtsü, ochimashi sen rizüngba nokdangtsü aser income tax magütsürtem nokdangtsü, ta metetdaktsü.
Chief Minister-isa state nüburtem dang ochimashi sobaliba tejen toktsür ochi sobaliba tenzüktsü ajungshia liasü.
Iba sentong tembangba sülen lokti dang, New Delhi nungi Ato kilonser, Modi-i Chartered Accountants den jungdak (live) jembiba sayua liasü.