ICC-i taoba Congo VP, Bemba merenshir

The Hague, June 21 (Agencies): International Criminal Court (ICC)-i taoba Democratic Republic of Congo Tatong Tir, Jean-Pierre Bemba Gombo tepuokdak küm 18 tashi puoka ayutsü temerenshi tanü, Bodbar nü agütsüogo.
Kidangsüa aliba Central African Republic (CAR) linük nung tetsürtem tashiyim agi taküm raksatsütsü aser nisung tepsettsüsa par Congo miktartem ajungmesoba ken o nung aitsüba sülen ICC-i Bemba tanü merenshia liasü.
“Bemba-i par mitkartem mazüokba yong par mitkartemi 2002 aser 2003 tsüngda CAR linük nung tebang agi mejembitettsüsa ozüng alema mapa inyakba kuli bushitetogo,” ta ICC obendanger, Sylvia Steiner-i metetdaktsü.
Bemba tan merenshiba ya ICC-i tongpang raradang ozüng alema inyakba aser mitkartemi meimchir temeten anema inyakba ken nung ajemdaker aibelener mezüngsüa aija merenshir lir.
Bemba-i aniba Movement for the Liberation of Congo (MLC) mitkartemi iba mapang CAR Tir menden abensang, Ange-Felix Patasse-i aniba sorkar anemer telok yaritsü nükjidong nung CAR linüki aia CAR mitkartem den tongpang raradang tetsür aser tila tanurtem jenti rishikangshia tepsetba osang bushitetogo.