ICC-i Yasir Shah cricket asaya nungi ita 3 anentsüogo

Lahore, February 7 (Agencies): Pakistan bowler Yasir Shah-i anti-Doping Code kübok aibelenogo ta nangzüba sülen International Cricket Council (ICC)-i Deobarnü pa cricket asaya ajak nungi ita asem atema anentsüogo.
November 13, 2015 nü Abu Dhabi nung England aser Pakistan tsüngda One Day International (ODI) asayaba sülen ICC-i Shah natzü tendanga liasü.
Iba tetendangba nung World Anti Doping Agency’s (WADA)-i shibangtsür aliba chlortalidone densema aliba putet.
Shah-i pai aibelenba nangzük aser iba aiblen atema December 27, 2015 nü nungi March 27, 2016 nü tashi, ita asem asoshi pa cricket asaya ajak nungi anentsü.
“Tanü iba osang metetdaktsüba ajanga ICC-i asayar ka ozüng alema drugs amshiba tsütsü taochi malitsü ta jangaja meteter aser international cricket asayartemi sobuba aser achi ajemba ajak agi ozüng kübok lia yimya tajung nung asayatsü tali ajungmesor,” ta cricket nung general manager Geoff Allardice-i sangdong ka ajanga metetdaktsü.
Arishi küm 29 tain, leg-spinner-i iba mozü aibelena achi ta metetdaktsü aser anünga aliba asayartemibo pa ama aibelen masütsü lemsatep.
“Ni tang nungibo kü indang blood pressure mozü kinüngtsü mozü den balala ayutsü merangtsü aser ibaji ajanga iba ama aibelen masütsü. Ni aibelenba yari kü nem temerenshi agütsüba ni agizüker,” ta Shah-i ashi.