ICC ozüng nung ajemdaker Ishant Sharma dang senchi achi

Colombo, August 23 (Agencies): Honibar nü India aser Sri Lanka na tang tasayadak test series tanabuba P. Sara Oval, Sri Lanka nung asayadang, India cricket team nungi fast bowler, Ishant Sharma-i asaya ozüng alema yimya masüba anaben benshiba ajanga pa dang kenü asayadang aaba sen nungi noklang nung shilem 65 senchi chiogo.
Pai tasayadak nung o mashi jembiba aser yimya yimpong mejungi sayuba ajanga batsman tem tejashi nung junga masayateti kara out süadokba dak sentakba nung International Cricket Council (ICC) Code of Conduct nung aliba Level 1 Article 2.1.7 nung ajemdaker pa anaben tashi aitsü.
“Pai mezüng Lahiru Thirimanne jashidakja out südaktsüba ajanga pai khenü asayadang aaba nungi noklang nung shilem 15 senji achi. Iba sülen ano Dinesh Chandimal dena kasa yimya benshiba ajanga pai khenü asayadang aaba nungi shilem 50 senji achi,” ta ICC- sangdong ka ajanga metetdaktsü.
Pai tanaben aibelenba metetdaktsüba mapang, match referee Andy Pycroft-i tesüsabuba aibelenji mezüng dang nungi tamajungba anungji temerenshia ibaji tuluba asütsü ta züluoka ayu.
Deobar nü asaya temer külen Ishant-ia pai aibelenba nangzükogo. Pai ita 12 tsüngda ano iba ama aibelenra iba dang nungi temerenshi tuluba agütsütsü koba ajanga asaya nungia khen tatsüka asoshi anendaktsütsü akok.
Iba obendang ya umpire Bruce Oxenford o Rod Tucker na den third umpire Ruchira Palliyaguruge nungeri agüja liasü.