ICC Test Rankings nung Kohli-i Smith ajatetogo

Luchii/December 4, 2019 (Agencies): Bodhbarnü sayaba ICC Test rankings nung batsmen tem rongnung Virat Kohli-i Steve Smith ajateta temaba jenjang tongtetogo. ICC-i sayaba ranking nung India captain-i point 928 nguteta temaba jenjang tongtetogo. Kasa mapang nung Steve Smith pa dang nungi point 5 agi tajemba lir.
Tawa tembangba Kolkata day/night Test nung Kohli-i 136 yanglua temaba jenjang nung aliba Steve Smith tera agi dang memenepi aküm. Ajisüaka Pakistan den tawa tembangba asayamung nung junga masayatetba sülen Smith point 931 aliba nung 923-i asepzüka alu aser Kohli nem ajatetdaktsü.
Pakistan den Test asaya ana nung Smith-i junga masayatet aser innings ana nung pai run tenem junga meyanglutet. Ajisüaka David Warner jenjang 12 tejakdangi atua top-five-i iogo. Pakistan den Adelaide nung tanabuba test nung pai out mesüi run 335 yangluba sülen tang iba jenjang ya ajangtetogo.
Kasa mapang nung Joe Root-ia New Zealand den asaya ka nung run 226 yanglua jenjang pezü tejakdangi atur top-ten tongtetogo. India nunger batsmen tem rongnungi Cheteshwar Pujara jenjang 4buba aser Ajinkya Rahane jenjang trokbuba nung lir.
Pakistan middle-order batsman Babar Azam jenjang ana tejakdangi atua jenjang 13buba nung lir. Pai Australia den asaya ka nung run 97 yanglua Pakistan nem teyari tulu agütsüba sülen iba jenjang ya ajangtetogo.
Bowler tem rongnung Mohammed Shami top-10-i iogo aser Jasprit Bumrah aser Ravichandran Ashwin na jenjang pongu aser tekububa nung lir. Bowler tem rongnung Australia nunger asayar Pat Cummins temaba jenjang nung lir aser South Africa nunger asayar Kagiso Rabada tanabuba jenjang nung lir.
Windies Test skipper Jason Holder-i Neil Wagner ajateta tasembuba jenjang tongtetogo aser Wagner jenjang pezübuba nung lir. Mitchell Starc-a jenjang pezü tejakdangi atua jenjang 14buba tongtetogo aser Afghanistan den asaya nung wicket 10 agiba sülen Rahkeem Cornwall top 50-i iogo.