ICC U-19 atema security peria agütsütsü: Sheikh Hasina

Dhaka, November 08 (Agencies): Bangladesh Ato Kilonser Sheikh Hasina-i, tang aruya U-19 World Cup atema lar sorkari security peria agütsü, ta International Cricket Council (ICC) dang nangzükogo.
Honibar nikongdang Ganabhaban nung Chief Executive Officer (CEO) Dave Richardson-i aniba nisung pezü telok den jembiba mapang lai iba tenangzükba agia liasü. January 22 nungi February 14, 2016 tashi U-19 World Cup Bangaladesh nung asayatsü, ta tesüiba October ita nung ICC-i ashiba bdnews24.com ajanga metetdaktsü.
Sheikh Hasina indang press secretary, Ihsanul Karim-i, “Hasina-i nüburtemi sapuba asaya ka asoshi linük tashi dak alia ‘world-class security’ agütsütsü nangzükogo. Iba den külemi ICC-i Cox’s Bazaar nung aliba cricket stadium tushia shiogo,” ta ashi.
Arishi küm 56 tain, Richardson-i, “Ni tan Bangaladesh semdangba ya linük nung security tsütsü asameyangtsü atema nüngdakba agency tem den ajuruteptsü asoshi lir,” ta ashi.
“Lendong tsübuba ajanga Australia-i Bangladesh tour tiogo ta asenok ajaki meteta lir. Anungji nüngdakba security agency tem aser linük nung yimsüsürtem den ajuruteptsü asoshi onok Bangladesh-i aru,” ta pai ashi.
Pai, “ICC-i asayamung ayonger linük ka indang security tashi teti tendangtsübasa aser ibaji ajanga asayartem, umpires, match officials aser parnok medemer o kinungertem lendong nungi kümzüker,” ta ashi.
“Tang tensa nung security ya tebilemtsü kanga ulua kümogo, ajisüaka ibaji ajanga asayamung sottsüji tamakoktsü,” ta Richardson-i ashi.
Tan security tendangba osang ya November ita tatem tashi nung agütsütsü.