Ice Hockey Team Bus truck ka den tsüktep; 14 asü

Ottawa, Rongchii 7 (Agencies): Junior ice hockey team ka mena aliba bus ka Canada kübok western Saskatchewan province nung tata gari ka den tsüktepba sülen parnok 14 tsüksetogo, ta local media osang ka ajanga metetdaktsü.
Saskatoon StarPhoenix osang ka ajanga ashiba agi, iba lendong nung parnok 14 yirur lir aser parnok asem temang kanga mejungi lir. Rogonü iba lendong ajuruba bus ya Humboldt Broncos team bus liasü.
Iba bus nung driver den nisung 28 mena liasü.
Police temi ashiba agi, iba lendong ya Tisdale tesem nungi km 28 shi pelar nikongtsütsü 5:00 ako shi nung atalok.
Parnok team ya Saskatchewan Junior Hockey League playoff game Nipawin Hawks den asayatsüba oya liasü.
Saskatchewan league nung asayartem aika US aser Canada nung college tem nungi aser major junior league jenjang nung asayar.Parnok rongnung karbo National Hockey League nung dena asayatsü asoshi maongka angur.
Iba team nung sayar 24 liasü aser parnok ajak ya Canada nungi lir. Parnok rongnung tanobusang ya arishi küm 16 aser tambusang ya küm 21 liasü.
Ice hockey ya national sport ka ama asayaba linük ka nung iba lendong ajanga nüburtem aoksadaktsüogo aser social media balala ajanga fan aser asayartemi hashtag #PrayforHumboldt amshia asükhu lemsateper.
“Kü career peyong bus nung senzütsüba atema yongyaa liasü. Iba tesem nung ya asayartemi parnok asaya ajak amadoka anisüngzükdak tesem ka lir. Taonungbo kü temulungjang Humboldt nung lir,” ta Anaheim Ducks nung defense asayar Steven Oleksy-i tweet asü.
Humboldt nung alir tetsür kati online fundraising page ka lapokba ajanga ghonda tsüngda nung sen CAN$40,000 shi aazük.