ICICI Bank-i anogo 100 nung yim 100 digital kümdaktsütsü

Mumbai, November 28 (Agencies) : Nija bank, ICICI-i, anogo 100 nung yim 100 nung yimtaklirtem sen teka nung mamshii kechisarena inyaktettsüsa digital yimtem kümdaktsütsü, ta Hombarnü metetdaktsü.
Linük kübok, item yimtaktem nung aliba nüburtemi digital inyakyim ajanga bank dak sendakba mapa aser bill agütsüba mapatem inyaktettsü, ta ICICI bank MD aser CEO Chanda Kochhar-i ashi.
“Bank ajanga linük nung terenlok bener arutsüba mapatem maneni inyaktsü. Technology ajanga terenlok tsütsü mapa tulu inyaktettsü ta onoki kanga sashia amanger. Technology ajanga yaküm küm onoki Gujarat kübok aliba Akodara yim India nung mezüngbuba digital yim kümdaktsüogo,” ta lai ashi.
Laisa, “Iba yimtak takok ngua inyaktetba ajanga onok tali ajungmeso aser tang onoki India nung yim 100 tashi digital yimtaktem kümdaktsütsü apusor,” ta ashi.
‘ICICI Digital Villages’ akümba sülen yimtaklirtemi Aadhar dak amendakba e-KYC amshia bank account lapoktettsü aser retail store tem nung mobile SMS/USSD ajanga sen agütsütepba maparen inyaktettsü.
“Onoki item yimtaktem teka nung sen mamshii litetba yimtem kümdaktsütsü, mezüng anogo 100 nung yimtaklir nisung 10,000 nem iba dak sendakba nung tesayuba agütsütsü aser parnok nija shishilemba mapa tenzüktsü atema sen aputsü maongka agütsütsü,” ta Kochhar-i ashi.
Yimtak aliba retail dokan kiburtemi mobile ajanga sen agütsütettsüsa yimti nung aliba shishilembartem den tesendaktep yanglutsütsü, ta Bank-i metetdaktsüogo.