IED asem aser oset aika Tinsukia nung angu

Dibrugarh, January 24 (Agencies): Tinsukia district kübok Jagun tesem nung Ulfa (I) telungpur teloki Assam Rifles tem dak mita lir amakba tesem nungi sepaitemi Hombarnü IED asem ngutetogo.
Telungpuri asemba süoshi, yangkhu, chiyongtsü, mozü aser tzü bottle amala oseta aika iba tesem nung ngutet. Iba lendong atalokba tesem anasa ongken tua aliba ajanga iba amakba ya tamalen nungi asalentong yanglua liasü ta bilemer.
“Iba lendong atalokba tesem aser iba temeket nung mitkartem aser police tem longjemer kanga sashia bushisüngdang südar. Iba tesem nung bomb rema aliba metettsü asoshi mitkar indang azü aika anir bushidar, saka iba tesem ya arem-min tulu asüba ajanga bushisüngdangtsü kanga tasak lir,” ta Special DGP (Law & Order), Kuladhar Saikia-i ashi.
“Lendong atalokba tesem nung aliba lenmang ya temetong aser kanga talang lir, saka mitkartem kümdangba ajanga telungpurtemi junga memaktet. Parnok ang takoksa tuluba ajurua, bomb aser oset balala yutsür ajen,” ta Saikia-isa shisem.
Iba lendong nung Assam Rifles nisung ana asü aser pongu yiru. Telungpura ana süa liasü.
“Telungpurtem prangpong-injang aser nisung peria maliba ajanga northeast nung aliba telungpur telok ajak longjemer raratsü bangjem, saka onoki parnok koktettsü renema lir,” ta paisa shisem.
Telungpurtemi northeast nung teti Republic Day amongtsü nokdanger, saka nüburtem aika adenshia iba benjung amonger, ta paisa ashi.
Deobarnü telungpur ana kahsetba ya ano mejangjateti lir, ta Tinsukia SP, Mugdhajyoti Mahanta-i osangbenertem dang ashi.