IEF-i Corona Virus tashidak nungi taneptsü meshia sarasademtsü ayonger

Mokokchung, March 20: Asenok ajaki meteta alima ajunga tetsüputsü aser ratamata agi sungogo. Aser aji nisung taküm aika samatsüba tashidak koba dang CORONA VIRUS -ta ajar, ibaya ajanga lir.  Alima rara (IInd world war) tanabuba sulen lendong tolutiba rongnung ya ka lir. Tanü joko alima ajunga nung senzü-senpongba nokdangadokogo; School, Colleges aser Universities ajak shibangogo. Office aser shi-shilembaba tesem ajak shipangogo; lokti senden, tekülemba tesemtem ajunga shibangogo; aser ibaya ajanga alima ajunga nung nepurtem ajak koda masüba timtem tolu agi tongogo.
Khrista Yisu nung temeim tamanger tajungtem, ya asenok atema asen Tsüngrem dang kanga nendaka sarasademtsüba mapang tajung ka lir. 2 Putipuyang 7:14 “Kü nebur shirnok kü tenung agi jaa lir, parnok sasa ajemaludi sura, aser kü jak bushira,aser sarasademra, aser parnok lemang tamajung nungi meyipra, idangji ne Kodak nungi angashitsü aser parnok temenen adoktsü, aser parnok lima aneptsütsü.” Ibaya asen Tsüngremi aneptsütsü indang tenangzükba khuli ka lir; “Ni Kodak nungi angashitsü, aser parnok menen adoktsü.”  Ainker Elisha mapang nung pai inyakba ama; pai metsü bena aru aser tzü koba tako liasü idakji inoktsü, aser tzüji tanang aküm.
Asen Tsüngremji taneptsü agütsüsang ta asenok ajaki mamadokli. Tangya asenok Tsüngrem chirtem tsüpuseta alitsü mapang masü, saka asenok ajaki, alima kin-tem ajunga asoshi sarasademtsütsü mapang, aser ibaya ajanga alima kintem ajaki asen Tsüngremji tsüngremtem madak Tsüngrem ta metettsü. Kija Kibong shiai iba CORONA VIRUS tashidak atema kanga sarasademdar sudi, saka tamangertem temolungjang ka ser lokti sarasadem Tsüngrem tsüngdang kanga senti asü-nung, International Evangelistic Fellowship (IEF)-I  membertem, aser temolungertem ajak Unit aser sub-Units, town aser yimtsüng ajak nung 25th March anepdang 6:00 Am nungi 10:00 Am tsahi lumia sarasademtsü ayongzüker. Tsüngremi ashi, “… nenok tetsübu, marakzüi nokdaka liang, aser Kibuba tekümtet koba nenok asoshi pai tanü inyaktsü aji reprangang; kechiaser tanü nenoki anguba Ijib nungerji nenoki tanaben kodanga mangutsü.” Tsüngremi iba CORONA VIRUS tashhidak madak senyatenya mapa tolu inyaktsü sarasadema atadi.