IEF tenzüker küm 50 ajungba Jubilee amunger

Mokokchung, Jan 23 (TYO): Jan 22 nungi tenzüka International Evangelistic Fellowship (IEF) pur Hon Jubilee sentong “kintem dangi Pa sentsüwangshi sangdongang” omen nung ajemdaker yangi Mokokchung town hall nung mungdaki. Iba sentong nung Nagaland tesem balala nungi IEF züngsem meyi aika adenshia shilem agia dendaki.
Jan 23 nü MLA C.L John-i tajungshi o jembidang, Ao kini Konyak nunger aser anüdoklen alir kintem lenla balala nung tenük lapoktsüba asoshi Aor dang pelaba den taoba IEF lenirtemi anibelem jenti agia mapa tajung inyaka toktsüba asoshi parnok nem akhüm tetushi agüja liasü.
Arogo Mungdang bo inyakyim onsaraba ajanga aiben nükjidong nungi pilaa oatoker, saka IEF yabo tanga tentet ka ama masü Tsüngrem o dak rangloker samaa alirtem anir aruba mapatem inyaker, ta pai ashi. IEF ajanga jentipur lenmang balala nung tajung kümdaktsüogo aser iba tentet ya konang nüngsang bushiba telok ka masü saka nisung ajak sakuku Tsüngrem tenzükba lokti ka lir, ta paisa shisem.
IEF tenzüker küm 50 tashi arudang tashi mait aser metokmepribatem asoshi kadi ka nem “tatok agütsütepa amatoktsü” aser “tarutsü nung tajungba inyaka aotsü nükla ayutsüla, kodang yamaji inyakdir, idangji ang shitakba jubilee amungba tajangzükji aji asütsü”, ta paisa ashi.
Missionary mapaji tanga linük talang kadi or inyakbaji dangbo masü, saka asen atep nunga teinyaktsü jenti lir, aji oda, IEF züngsem shiaji missionary kaka ama mapa tajungji maneni inyaktsü asoshi paisa ajungshia liasü.
Taoba mapang asenok tammang nung liasü saka tanü Naga nunger kechi jenjang nung lir, iba ya tongtibangsa asen limai Christianity aruba ajanga lir. Naga Club, Naga Peoples Convention aser NSF tenzükba, Statehood anguba, India nungeri Naga kin balaka ta agizükba aser ano aika lir, item ajak ya Christianity aruba temoatsütem lir, anungji, item ajak asoshi Tsüngrem tenüng sangdi, ta paisa ashi.
Tanü sentong balala ana nung Rev. Dr. Noklen aser KBBB Mon Executive Secretary Rev. Chemyuh nadi Tsüngrem osang aben. Jan 24 nü sentong balala nung ABAM Executive Secretary Rev. Dr. Mar Atsongchanger, IEF President T. Chujang Aier, MLA L. Kijong Chang aser E.T Sunep IAS (Rtd) parnoki tongti shilem agitsüba lir.