IEM indang 48 buba National Convention tembangogo

IEM Gen. Secretary Rev. Dr. Singh Elias den IEM Naga Missionary tem agiba noksa angur.

Dimapur, October 22 (TYO): Indian Evangelical Mission indang 48 buba National Convention Deobar nikongdang tembangogo.
Iba mungdang ya Dimapur Ao Baptist Arogo (DABA) nung ayongzüka agi aser India den Australia, Singapore, USA aser UK linüktem nungi teshimtet nübo 708 tashi arua aden.
Mungdang nung adenertem rongnung mission workers – field & church, IEM yarirtem aser mission jangraba nisungtem dena liasü.
Mungdang nung o jembirtemi “Khrista nung tabensa” (Kolosi 1:19) omen nung ajemdaker Tsüngrem o aser Laishiba tesayubatem agütsü.
IEM 48 buba National Convention nung tongtipang shilem kaji Poraik oshi (Arunachal Pradesh) nung Gospel of Mark & Grammar aser Assamese Musalmani oshi nung 1 Corinthians aser Titus sayaba liasü.
Maneni, iba mungdang nung OMF International aser Evangelical Churches Association Manipur, IEM tsüngda mission partnership atema MoU ka nung sign asü.
Deobar nikongdang tatembangba sentong nung mendenji, Rev. Dr. Shiwoto Assumi liasü, Mrs. Alino Punyu-i temoatsü meshia sarasadem, Dimapur Lotha Baptist Church, Making Music Sing (MMS) aser Madhya Pradesh, Maharashtra o Chattishgarh nungi arurtemi ken balala ajanga shilem tajung agi.
Sentong nung HoD, Church Ministries IEM Bro. Jenny Christopher-i Tsüngrem o jembi aser Convention Coordinator Lumdemo Kikon-i anküp tepela o jembi.
Talisa, higher studies züngnürtemi The Dallas Baptist University, USA ajanga Hombarnü shisatokden sentong ka ayongzüka agitsü. Iba sentongji October 23, 2017 nü Elim Hall, DABA nung anepdang 10:00 ako nung agitsü.
Indian Evangelical Mission (IEM) ya January 1965 nung tenzük aser iba telok ajanga arogo tentetba, sayutsüngiba, Laishiba meyipzükba, kakettem züluba, tribal hostels lapokba aser medical ministry inyaker.
IEM-isa lokti aser rongsenkettsüng dak sendakba mapatem, lenisüba training, Bible schools, kibong, arogo lennirtem aser Khristan tenzükertem atema workshop tem ayongzüka agir.