IFDOL-i leadership programme agidar

Tuensang, June 30 (TYO): Mokokchung district kübok Clark Theological College (CTC) nung April 18-28, 2016 anogotem nung Eastern Nagaland nungi Baptist Association trok nungi Institute for Development of Leadership (IFDOL) 4buba senden agidang lemtetba ama mezüngbubaren follow up leadership development training Tuensang district nung June 27-29, 2016 anogotem nung kaogo.
Anogo asemnü training nung project director, Nuklu Phom (PBCA executive secretary) aser IFDOL consultant, Rev Dr Takatemjen (taoba mapang CTC principal aser NEALEAST Tir) nati Tuensang district kübok tesem balala nung training agitsü. Parnoki Nagaland nung Eastern tribe pezü nungi Arogo nung inyakertem pastor aser Arogotsür lenirtem den tribal aser lokti lenir nisung 400 dak tema nem training agütsüba den külemi shisa lemsatepa liasü.
Follow-up leadership training tongtibangba nükjidongji Simply Telling Stories (STS) atema lir. 4buba IFDOL programme alidang Eastern Nagaland nungi Baptist Associations trokprongla semdanga Arogo lenirtem nem STS training  katsütsü atema lemteta liasü.
STS ya tongmelang agi Laishiba indang jembiba lir. Iba ya ajanga lokti nung tebutem telok balala küma tenteter Laishiba tekongtem zünga o lemteptsü atema lir.
2016 July ita training shilem tanabuba alidang IFDOL-i Mon aser Longleng district na nung iba training katsütsü.
IFDOL ya Eastern Nagaland nung Baptist Association trok den parnok kübok Arogotemi ayongba leadership development programme ka lir, aser iba training ajanga onük balala den tang Arogo tenyaba mapa nung tayongzükba balala atema inyaker.
IFDOL ya 2013 küm tenzüka liasü.