IFFI 2016 nung Pakistan nunger Film mesayatsü

New Delhi, November 02 (Agencies): Taruba 47buba International Film Festival of India (IFFI) nung Pakistan nunger film kata mesayatsü, kechiyong iba linük nungi yokba entries anaji temsüa mali, ta osang ka ajanga metetdaktsü.
Mongolbarnü Union Information & Broadcasting Minister, M. Venkaiah Naidu, Union Minister of State for Information & Broadcasting, Rajyavardhan Singh Rathore, Goa Deputy Chief Minister, Francis D’souza aser Directorate of Film Festivals Senthil Rajan nungeri osangbenertem senden ka ayongzüka jembiba liasü, aser iba senden nung poster sayatsüba den film festival dak sentakba osangtem lemsatep.
IFFI 2016 ya Goa nung November 20 nungi 28 nü tashi akatsü.
Osangbenertem senden nungsa, alima tesem ajaklen nungi entries 1032 rongnungi IFFI 2016 nung linük 88 nungi film 194 sayatsü, ajisüaka iba nungji Pakisan bo maden, ta sangdonga liasü.
Osangbenertem dang Rajan-i, “Takümbo onoki Pakistan nunger film kecha mesayatsü. Onoki Pakistan nungi entries ana angu, ajisüaka film committee-i item film ji temsüa mali ta shiogo. Onoki linük 102 nungi entries 1000 dak tema agizüka liasü,” ta metetdaktsü.
“Film ana tenüngji ni memetet, saka itemji meshim,” ta paisa ashi.
2007 küm 38buba IIFI nung Pakistan nunger film mezüng sayabaji ‘Khuda Kay Liye’ liasü aser yaküm-a IFFI nung film yanglur, Jamshed Mahmood Raza indang Pakistan nunger film ‘Moor’ sayaogo.
Ano Naidu-ia, film tem rongnung tetoktepba balala lir, ta ashi. “Entries 1032 agizük. Item rongnung shimba film temji nenoki metettsü, kechiyong itemji sayatsü,” ta pai ashi.
Tamalenbo IFFI ya November 20-30 anogotem nungsa ayonga liasü, saka takümbo anogo anati jelia agir.
Poland nunger director asür, Andrzej Wajda indang ‘After Images’ film agi iba film festival tenzüktsü. Iba film ya Poland nunger Painter asür, Wladyslaw Strzeminski taküm otsü nung ajemdaker yangluba film lir.
Ano South Korea nunger film yanglur, Kim Jee-Woon indang ‘The Age of Shadows’ film agi iba festival shibangtsü. Iba film ya sangküm Oscas atema South Korea indang official entry film lir.