IFL: Nagaland United-i mezüng asaya nung takok nguogo

Dimapur, Mongputeni/Oct. 30 (TYO): Indian Football League (IFL) 2026-27 nung tang mezüng shilem agir Nagaland United SC-i Hokulbarnü TRC Stadium, Srinagar nung season tenzüka Real Kashmir FC den asayaba nung 3-1 agi takok angu.

JH Remlala-i asaya tenzüker minute asem buba nung goal ka agütsü aser minute 21 buba nung Vanlalhriatzuala K-i tanabuba goal agüja liasü.

Minute 59 buba nung Nagaland United captain Rohmingthanga-i pasasa goal ka idakja Real Kashmir teimla tasen ka angu, saka Vanlalhriatzuala-i ano minute 74 buba nung goal ka agüja points asem ngur iba asaya tembanga liasü. Vanlalhriatzuala nem Man of the Match agüja liasü.

Iba ya Nagaland United SC asoshi mezüngbuba takok alitsü aser Indian Football League nung mezüngbuba points ngua sayamung tenzükogo.

Nagaland United head coach Kaizad Ambapardiwalla-i starting XI nung asayar pongu arishi küm 22 tekübok alirtem shima defence nung C Zomuanpuia, Laldanmawia aser Stephen Lalrinfela asaya, midfield aser attack nung Laltnanzova aser JH Remlala liasü.

Real Kashmir head coach Ishfaq Ahmed-i 4-4-2 formation nung asayatsü shimteta goalkeeper James Kirthan amen aser under 22 asayar ana, forward Khullakpam Zahir Khan aser defender Amzard Khan liasü.

Asaya tenzüker minute asem buba nung Stephen Lalrinfela-i meta talang nungi thrown-in asüba ajanga Real Kashmir penalty area nung mangmangtepa liasü. Remlala-i mezüng yoktsü merangba nokdang saka paisa ano tanaben metsüokja liasü.

Minute pongu buba nunga Nagaland United asayar temi goal ka agütsütsü maongka tajung angu, saka parnoki iba maongka magitet.

Minute 13 buba nung Real Kashmir indang captain aser forward nung asayar Marcus Leric Jr Joseph-i kanga kera asema ao, saka Joseph Lalvenhima-i pa dangi yoktsü merangba X Zomuanpuia-i rakzük. Minute ka lir centre-back Mohd Sajid Dhot-ia clearance ka agütsü saka iba maongka magitet.

Real Kashmir nungi asayar temi ball ya timba amshia liasü, saka Nagaland United asayar temi kanga süngjema tanen makai goal yoktsü merang. Minute 21 buba nung azüklen nungi ball aruba Vincent Lalduhawma teko agi agizk aser Zim uansanga dangi yok, shibai ano Lalduhawma nemsa meyipa agütsü. Pai Vincent dangi yok aser Vanlalhriatzuala dangi yoka pai tetsüng abelen agi metsüokja 2-0 akum.

Minute 24 buba nung Real Kashmir-i goal ka kepzüktsü ama liasü, kong Oinam Sanatomba Singh-i abelen nungi cross ka agütsüba Thabiso Nelson Brown-i penalty area nungi tekolak agi tongloktsü, saka crossbar alema ao.

Asaya mezüng noklem tembangba sülen Real Kashmir nungi asayar temi kanga meranga asaya, saka parnok nükjidong metongtet.

Minute 59 buba nung achichilen nungi Lalvenhima-i cross ka agütsüba Nagaland United captain Rohmingthanga-i tongtoktsü merangdang asaa mesür aibelena par net nung tonglokja 1-2 akum.

Ajisür Real Kashmir asendenshir asaya, saka minute 74 buba nung achichilen nungi Zomuansanga-i agütsüba ball Vanlalhriatzuala-i agizüka idaktsü aser goal 3-1 akum.

Minute 83 buba nunga Nagaland United defender Laldanmawia-i kanga junga metsü, saka James Kirthan-i nokdanga liasü.