IFR 2016 nung Indian Navy indang tashi sayuogo

Visakhapatnam, Feb. 06 (Agencies): Honibarnü Visakhapatnam tzüküm anasa International Fleet Review 2016 (IFR 2016) alidang Indian Navy indang tashi alima dang sayuogo.
Iba sentong nung India Tir, Pranab Mukherjee-i presidential yacht INS Sumitra nungi jahaztem reprang aser linük 50 nungi navy tem adenshia Indian Navy indang tashi sayuba sentong nung shilem agiogo.
Indian Armed Forces nung Supreme Commander, Mukherjee den Prime Minister Narendra Modi aser defence minister Manohar Parrikar nungera International Fleet Review (IFR) nung denogo.
Iba fleet review nung Indian Navy indang jahaz 71 tashi liasü aser jahaztem rongnung aircraft carriers – INS Vikramaditya aser INS Virat densema liasü.
Tanü ayongzüka agiba sentongji India nüjiso anguba sülen Indian Navy fleet review 11 buba aser India-i international jenjang nung ayongzüka agiba sentong tanabuba lir.
Indian Navy jahaztem reprangba sülen osangbenertem den jembidang Tir Mukherjee-i, tembar linük 50 nungi Navy temi tzüyim ajanga Visakhapatnam nung mezüngbuba IFR nung adentsü atema naval ships aser teshimtet teloktem aru, ta ashi.
“Alima nung Navy temi pei linük den tesentaktep takhang aliba aser akhümtsübuba sayua fleet review sentongtem ayongzüka agir. Ibala sentong ajanga tzüyim nung senzürtem aser linük tsüngda tesentaktep akangshir. IFR 2016 ajanga iba tatishitsü tajungba nung sayuogo” ta paisa ashi.
“IFR 2016 nung Indian Navy indang tashi sayuba dang masü saka alima tesem balala nungi navy tem India tzüpak nung adenshia shilem agidaktsüogo. Iba ya ajanga asenoki yimjung, amalitep aser tesentaktep tajung atema tzüyimtem amshiba kuli sayur,” ta Tir Pranab-isa metetdaktsü.
Indian Navy-i International Fleet Review (IFR) tesüsabuba ayongzükbaji 2001 küm asür APJ Abdul Kalam Tir inyakba mapang liasü. Iba sentong nung linük 29 nungi navy tem adenshia shilem agi.