IFS atema jurila tatidang agitsüla: Shashi Tharoor

New Delhi, October 20 (Agencies): Congress lenir tain aser Parliamentary panel on External Affairs mendenbuba, Shashi Tharoor-i, sorkari bendanglen inyaker ketdangsertem tang aliba dang nungi timba shimtsüla, aser Indian Foreign Service (IFS) atema jurila tatidang agitsüla, ta ashi.
Osangbenertem den jembidang Tharoor-i, “Brazil linükibo foreign service balala nung ketdangser 1200 shima lir, ano China-i ketdangser 6,000 aser US-ia bendanglen inyaker ketdangser 20,000 shima lir. Asenoka US mesüra China amaji ketdangser ayutsüla, ta ashir masü. Ajisüaka ketdangser 800 (India nunger) yabo kanga ajemer, ano timba shimtsüla,” ta ashi.
External affairs committee-isa IFS ketdangsertem ajema aliba atema tebilemtsü kaa metetdaktsüogo. Parnoki, India nung IFS ketdangser 912 alitsü lateta lir, ajisüaka tang IFS ketdangser 770 dang lir, ta metetdaktsü.
Foreign Ministry aser India linüki ajangshiba tayongzükbatem den medemdangra bendanglen inyaker ketdangsertem kanga ajemer, ta committee-isa ashi.
IFS ketdangsertem shimtsü atema tatidang jurila agitsüla, ta shia Tharoor-i, IFS ya elite service ka dang asüba mapang tu süiogo, aser IFS ketdangser shimtsü atema candidate kaji UPSC ranks junga angurtem asütsüla, ta ashi.
“Ajisüaka foreign service nung inyaktsü shima alir ketdangser aikati iba service maginer. Iba service aginertemji khenyongi balaka asutsüla. Anungji IFS atema tatidang jurila agitsüla,” ta paisa ashi.
Bendanglen inyaktsü atema ketdangser ka jagi alima dak sendakba onüktem jangratsüla, aser jembishinü ajungtsüla, ta paisa shisem.