IG tetsür team-i tebur team den saya

Kohima, July 17 (TYO): Rüziezou Colony Youth (RCY) lenisüba nung tan mezüngbuba Futsal (Five a side) championship asayamung mezüng asaya July 16 nü mokokaka Indira Gandhi (IG) tetsür team-i Brihostibar nü D. Khel moapu Seikhazou, Kohima Village nung futsal sapurtem kanga puadaktsüogo.
Asaya mezüng round nung Turaco, Kohima Science College team-i 6-0 agi IG team akok, ajisüaka Nagaland football otsü nung IG team-i kodanga mamatettsüsa shilem agitetogo. Iba asayamung nung parnoki shilem agiba asoshi sentong ayonger aser tereprangertemi tenüngsang agüja liasü.
IG stadium Administrator Teisobou Sekhose den phone nung jembiba mapang iba championship nung tetsür team-a shilem agiba asoshi pelaba lemsatepa liasü. “Tetsürtemi tebur den asayatsü pela liasü aser iba ya parnok asoshi tajangshiba tajung ka lir,” ta Sekhose-i ashi.
IG Girls Academy nung tang tetsür asayar ajak agi parnok 32 lir. Iba academy ya Nagaland department of Youth Resources & Sports-i repranger aser parnok rongnungi par 10 tebür den asayatsü asoshi shimtet.
Asaya repranger tetsür kati ashiba agi, tetsürtemi tanü kanga junga masayatet aser parnok tebur den asayar asüba agi sadok-sadoka masayatet.