IGA New Delhi nung sen crore 2.5 jenjang hon apu

New Delhi, September 20 (Agencies) : Deobarnü New Delhi nung Indira Gandhi International Airport (IGIA) nung custom ketdangsertemi tatalokba balala nung hon seret 10 shi puogo.
Ozüng alema India-i hon bener arutsü merangba mapa atema ketdangsertemi nisung asem apu aser parnok rongnung Chartered Accountant ka dena lir.
Mezüngbuba tatalokba nung customs ketdangsertemi Qatar airways tayimtsü ka nung metsümeshidak nungi hon seret 4 shi angu.
“Iba tayimtsü ya Doha nungi tanep yakta tonga aru aser onoki tayimtsü mita bushidang hon seret 4.2 ji angu” ta Additional Commissioner of Customs, Vinayak Azaad-i ashi.
Onoki apuba indang hon jenjangji sen crore 1.09 shi asütsü, ta paisa ashi.
Ano, tanga tatalokba ka nung Customs-i Delhi nung alir nisung ana apu. Tena ya Dubai nungi aru aser tenati abenba khu nung hon seret 2.635 aser gram 740 miima bena liasü.
Tena ya ka Chartered Accountant aser ka lawyer lir, ta Azaad-isa metetdaktsü.
“Chartered Accountant jagi bank ka nungi sen crore 1.5 apu aser iba nungi pai sen lakh 60 agi hon miima shibelentsü merang” ta paisa shisem.
Tanü tasembuba tatalokba nung Turkey nunger kati hon seret 2.6 bener arutsü merangba atema apu.
Iba nisung ya Istanbul nungi aru aser pa belt aser trolley bag indang tetsüng nung honji miima bena liasü, ta Azaad-isa ashi.
Deobarnü apuba hon ajak meyipeter seret 10 shi lir aser iba jenjangji sen 2.64 shi asütsü, ta Customs ketdangserisa metetdaktsü.