IGAR(N)-i National Integration rally tenzüktsü

IGAR(N)-i National Integration rally tenzüktsü

Kohima, October 23 (TYO) : Linük nung kaketshirtem longjemdaktsütsü nükjidong nung Kohima nungi kaketshir telok ka Himachal Pradesh-i students exchange programme (SEP) atema ao.
Iba sentong ya October 22, 2015 nü Inspector General of Assam Rifles (North) Maj Gen MS Jaswal-i tenzüktsü. Kohima nungi kaketshirtemi Solan district kübok Kasauli semdangtsü.
Iba sentong ya “Best Friends Forever” omen nung ajemdaker agir aser Major General-i ashiba agi, iba sentong ya ajanga ozüng alema inyaksangshiba state ka nungi kaketshirtemi state adena orr alima tobur ajung angutsü aser yimjung tensa nung aliba libaliro ajizüktsü, aser tangar sobalibatem angazüktsü.
Lanur kaketshirtemi linük nung tanga tesemlen ozüng alema inyaksangshiba melena yimjung nung aliba tali angatettsü, ta Gen MS Jaswal-isa sentong tenzüktsüdang ashi.
Kohima nung Don Bosco School, Little Flower School aser Mount Sinai School nungi kaketshir 16-i Himachal Pradesh kübok Kasauli semdangba den külemi Delhi, Chandigarh, Shimla aser Amritsar nungertem semdangtsü aser iba sülen parnok November 12 nü meyipa arutsü, ta paisa shisem.
Kasauli nungia kaketshirtemi Kohima semdangi arutsü sentong lir, ta Major General-isa metetdaktsü.

You must be logged in to post a comment Login