IGI airport nung iPhone 6S & 6S Plus 182 bener nisung tenet apu

New Delhi, October 4 (Agencies): Indira Gandhi International Airport nung tan ita sayatsü aliba iPhone 6S aser 6S Plus 182 bener nisung tenet puogo.
Item phone tem ya Hong Kong aser Singapore nung tayimtsü balala nung arur, arishi küm 20 nungi 30 tsüngda alir parnok tenet ket nungi ngutetba lir, ta ketdangsertemi ashi.
Ketdangsertemisa ashiba agi, parnok rongnung karbo sen talang agütsür iba mapa ya inyakdaktsürba liasü ta jangjaogo.
Osang tejangja angashiba sülen customs official temi item nisungtem pua parnoki bena aliba iPhone tem ya nguteta liasü.
“Parnok ajak yangku nung iPhone 6S aser 6S Plus bena liasü. Onoki iba phone 182 pua lir,” ta IGI tayimtsü anenba tesem nung Customs Additional Commissioner Vinayak Azaad-i metetdaktsüogo.
Item lanur rongnung kar nembo sen agütsür iba mapa ya inyakdaktsürba liasü ta putetogo. America nung aliba tech tetsüti Apple company-i parnoki yanglutetba iPhone 6S aser iPhone 6S Plus tasenba ya India nung October 16 nü sayatsü sentong lir.
Company-i tang tashi nung item phone ya India nung sen kwi agi ayoktsüar ano memetetdaktsü. September 25 nü US nung sayaba sülen tang tashi nung item phone million 13 tashi yokogo.
Tan parnoki yanglutetba iPhone tasenba ya US, UK, Australia, Canada, China, France, Germany, Hong Kong, Japan, New Zealand, Puerto Rico aser Singapore linük tem nung September 25 nü nung tenzüka ayok aser item linük rongnung hon shibelenba nung kanga tenüngteta meteta aliba linük ana, Hong Kong aser Singapore nati timba alizüka liasü.
“Onoki Hong Kong, Singapore aser tanga anülulen linüktem den South Asia linük tem nungi aruba nisungtem kanga junga mita atar kechiba süra item tesem nungi arurtemi hon kanga shibelener. Tan apuba sülen iPhones dena shibelenba jangjaogo aser ibaji atema maneni tenük yoka atatsü,” ta Azaad-i ashi.
Pai ashiba agi, iba dak sentakba nung tali metettsü asoshi item lanurtem pua asüngdangya süogo.