IIT nung azünger ka sür lia angu

Guwahati, September 18 (Agencies): Indian Institute of Technology-Guwahati (IIT-G) nung final-year azünger ka Hokolbar nü parnok hostel anasa sür lia angu, ta police-i ashi.
Institute tanükertemi iba tasümangji IIT-G indang Brahmaputra Hostel anasa anguba sülen yangji inyakertem dang shia parnoki police nem osang agütsü.
“Tasümangji sensaa reprangtsü asoshi bener yokogo. Pa ya kari tepset asü mesüra pa sasa soseta asüar ano tangbo kecha meshitettsü,” ta police ketdangser kati ashi.
IIT-G nung otongdari, tasüsangji Bihar nungi Ujjal Shailabh lir, ta metetdaktsüogo.
“Pa ongko aser computing tsütsü B.Tech final-year liasü. Onoki par kinüngertem dang iba tatalokba shiogo,” ta otongdarisa ashi.
Yaküma iba IIT-G nung azünger ana institute telung nung soseta süa liasü.