IITs nung tetsür kaketshir talila admission sütettsü

New Delhi, April 15 (Agencies): 2018 academic session nungi Indian Institutes of Technology (IITs) nung tetsür kaketshir teimbai admission sütettsü, kechiyong tanü admission board-i tetsür kaketshir nem “supernumerary” mendentem lemzüktsütsü mulunga agizükogo.
IITs nung tetsür kaketshirtemi admission mesütetba khuret bena, yaküm Joint Admission Board (JAB)-i professor Timothy Gonsalves menden sür luden ka nem iba khuret koktettsü atema lenmang bushitsü mapa nungloktsü, ta HRD ministry ketdangser kati ashi.

Iba luden jagi taküm küm tetenzüklen, IITs nung menden ajak nungi tetsür nem supernumerary seats noklang nung shilem 20 agütsütsü tebilemba ka shidang.
Tanü JAB senden amendang iba tebilembaji benoka olemtep aser parnoki mulung agizük, ta HRD ministry ketdangser-isa ashi.
“Kümshia supernumerary menden indang shilemji reprangshitsü. Menden teimba akümba ajanga teburtem asoshi lemzükja aliba menden nung timtem majurutsü aser temelenshiji küm 8 atema dang asütsü. Maneni, tetsürtemi yutsüba menden nung tetsürtem dang shimoktsü” ta paisa shisem.