ILP aser RIIN memeyokteptsüla: NSF

Dimapur, July 31 (TYO): ILP ya küm 146 tain lir saka taoba küm 60 tema sorkartem melentepa ketdangsüa arudang iba mapa shitak meinyakteti arur, ta Naga Students’ Federation (NSF)-i tanü metetdaktsü.
Sorkari ILP mapa shitak meinyakba ajanga ozüng alema arurtem parnok sünütsü süa arudaktsüogo. Tourists aruba reprangtsü aser ozüng alema arurtem noktangtsü atema kulikaket tajungtibaji ILP lir, ta NSF-isa ashi.
Tashitait aser ochishir lennirtemi ketdangsüba sorkar kati ILP mapa inyaktsüla. NSF aser Federating Units-i district balala nung ILP holders jangjashiba mapa inyaka arudang ozüng alema arurtem ajanga Nagaland nung lisopurtem timtemi aitsüsa tensa angudang onok temulung mesüngjemteter, ta NSF President Ninoto Awomi aser Vice-President Dievi Yano nati sangdong ka nung ashi.
Onoki küm aika ILP kübok Dimapur dendaktsütsü atema jembiyonga arur. Bengal Eastern Frontier Regulation (BERF) 1873 shitak meinyakba aser ILP kübok Dimapur District medendaktsüba ajanga Dimapur ya ozüng alema arurtem tejenokdak ka kümogo.
Dimapur District nung taitsü aketba nisungtem jenoka lir aser parnok teimba ka Identification Proof mali. Dimapur nung parnok yamai dang jenokdaktsüra, Nagaland küboki tanüngba tesemtem aser North East ajungalen ozüng alema arurtemi asüngtsü aser idangji asen maitsü, sobaliba aser asenok liyonga aotsüba nung timtem ajurutsü, ta NSF-isa metetdaktsü.
Anungji, sorkari RIIN ya ILP den memeyokteptsüla kechiyong RIIN ya Nagaland state sorkari tentetba luden kati reprangshimdar. Sorkari RIIN mesüra tanga tatemtsü amer ILP mapa tenzüktsü asoshi mapang matsülangtsüla, ta NSF-i ashi.
Sorkari Dimapur district nunga ILP mapa tenzüktsüla aser chichiba senso ajak kümzüka ayutsü atema maparen ka tenzüktsüla, ta parnokisa ashi.
Abhishek Singh-i aniba ludeni Dimapur district nung ILP benoktsü indang osang agütsüba onoki posema nungiter, anungji sorkari mapang lateta yur ILP mapa tenzüktsüla, ta NSF-isa takhangba agütsüogo.