ILP atema Manipur nung longkak aittsü

Imphal, May 03 (Agencies): Manipur nung lokti tentet aikati akumba tenteti maneni state nung Inner Line Permit (ILP) takhangba agüja May 5 nungi 7 nü tashi longkak aittsü, ta Mongolbarnü sangdongogo.
Mongolbar nikongdang Imphal nuung osangbenertem senden ka nung Joint Committee on Inner Line Permit System (JCILPS) convenor, Khomdram Ratan-i iba osang sangdonga liasü.
“(India) Tir office nung benoka aliba bill asem atema telangzüba magütsü tashi taruba anogotem nunga maneni longkak aittsü. Ozüng alema arua alirtem anema maneni inyaktsü atema Hombarnü senden ka amendang lemtet,” ta pai ashi.
Yaküm August 31 nü Manipur Assembly nung bill asem- Protection of the Manipur Peoples Bill, 2015; Manipur Land Reforms & Land Revenue (7th Amendment) Bill, 2015; aser Manipur Shops & Establishment (2nd amendment) Bill, 2015 agizüka liasü.
Ajisüaka state nung tribal temi ibaji ashishiba ajanga state Angh-i item bill ji India Tir matsüngdang benoka lir.