ILP inyakyim anema PIL agütsüba agi aoksar: BJP Nagaland

Kohima, June 27 (TYO): Dimapur nung ILP benoktsü atema inyakba anema Ashwini Upadhyay-i PIL ka agütsübaji State BJP Nagaland-i süoki ia agir; BJP Nagaland-i memeteti iba PIL ya agütsüogo, kechiyong osangkakettem nung Nagaland nung ILP ulushiba dak sendakba nung PIL agütsüba osang mangu tashi onoki Ashwini Upadhyay memeteti liasü, mesüra BJP Nagaland nungi shingaia pa majuru, ta Brihostibarnü State President BJP Unit Nagaland, Temjen Imna Along-i sangdong ka nung metetdaktsü.
“13buba Nagaland Legislative Assembly 3buba session nung jembidang Nagaland Angh-i, ILP agütsüba inyakyim yanglushitsü atema sorkari legal aser administrative mera agia inyaktsü aser Dimapur densema state tesem ajaklen ILP benoktsü ta shiogo. Iba sülen state sorkar Committee aser Home Department nati iba atema maparen tenzükogo,” ta sangdong nung shia lir.
“State sorkar nükjidong aser telemtetbatemji PDA-ia maneni inyakdar, anungji PIL benokba ajanga BJP, Nagaland aoksar. Nagaland nung sensotem aser Naga nungeri ayimtena akhangbaji BJP-i kanga akhümtsübur. Iba nungji ajemdaker BJP Nagaland-i Centre nung party lenirtem den jembia inyaktsü. Iba denji külemi shingaia iba nungji ratamata-a malitsüla aser ILP Committee-i benokba onüktemji tekaraba nung mapa küma inyaktsü atema BJP Nagaland Unit-i inyaktsü,” ta kasa sangdong nung shia lir.