ILP nungi refugee mezüngdoktsüla: AAPSU

Itanagar, December 11 (Agencies): ILP nungi Chakma aser Hajong refugee tem züngdokba kodanga magizüktsü ta All Arunachal Pradesh Students’ Union (AAPSU) lennir Hawa Bagang-i ashi.
“Linük nung Citizenship (Amendment) Bill (CAB) mapa küma inyakra Chakma aser Hajong refugee temi India senso angutsü, saka parnok Arunachal Pradesh telungi aittsü atema Inner Line Permits alitsüla” ta pai ashi.
“Iba ya home minister Amit Shah-i onok dang nangzükba lir” ta Bagang-i osangbener dang ashi.
“AAPSU-i noktakba nungi masetshir aser Chakma aser Hajong nungertem state nungi anientsü atema onoki Shah dang shiogo” ta paisa shisem.
Parnok nem India senso agütsüra, Centre aser state sorkartem parnok nem refugee indang teyari agütsüba anentsü, ta Bagang-isa metetdaktsü.
“Chakma aser Hajong nunger atema Centre indang tebilemba mejangja lir” ta Union general secretary Tobom Dai-ia ashi.
“Chakma aser Hajong nungertemi India senso anguba sülen state toktsür aotsüla. Ajisüaka, iba mapa ya Centre asü state sorkari inyaktsü’ar osang kecha mali” ta paisa ashi.
NESO-i AAPSU den külemi küm aika Chakma aser Hajong refugee tem anema inyaka arur aser kaketshir lennir aika taküm samaogo, ta North East Students’ Organization (NESO) coordinator Pritam Bhai Sonam-ia ashi.
“Kaketshir lennirtemi taküm bendanga agütsüba amajok mekümdaktsütsü anungji onoki tatem tashi noktaktsü” ta Sonam-isa shisem.
Chakma aser Hajong nunger ya taoba East Pakistan ta ajaba Chittagong Hill Tracts nungi lir. 1960s mapang Kaptai dam project ajanga parnok alidak tzü agi metsüngbangba sülen parnok aika Arunachal Pradesh nung arua jenok.
Parnok ya taoba mapang Assam kübok Lushai Hills district ajanga India telungi ait.
Parnok kar Lushai Hills nung telidak Chakma nunger den ali aser India sorkari refugee teimbaka Arunachal Pradesh nung lidaktsü.
Chakma nunger teimba ka Buddhist nunger aser Hajong nunger ya Hindu tamangertem lir.
Tang Arunachal nung Chakma aser Hajong nunger lakh 1 tema lir ta asadangteter.