Ilungang Tsüngrem (T.Ken 80:1-5)

Tsüngremi ne taküm nung meilungi inyaka ali asü? Dawid den Pa yamaji liasü. Iba ken ya Sauli Dawid timtemdaktsü dang zülu. Aji asünung pai ayimten, “Kibuba, kechiba nai kecha meinyaker. Na kanga meilungi lir.”
Tsüngremi meimba indang nai shisadanga lir ma? Pai kodanga mariteper, saka kodang Pai mapa inyaktsü tenzüker, repranga liang. Dawidi mepishi, “Ilungang, ilungang” (t.1). Pai pa temepishiba tekong 5 nung lepshia ashi: “Saka ni sensaker aser anünga lir; kü dangi kara arung, O Tsüngrem: Na kü teyari aser kü kümzükba; O Kibuba menua teli.”
Tsüngrem mapa inyaker masü, menur ama süra, nai kechi inyaktsü? Pa bushiang aser Pa dang ataa liang aser Pa meimang. Tekong 4 kanga tobur junga shia lir: “Shiri na bushir parnok ajaki peladakjang aser ne dak temulung süngzükdakjang; aser shiri ne tekümzük meimer parnoki maneni Tsüngrem tushidakjang” (T.Ken 69:30).
Yangi asenok asoshi lesson tajung ka lir. Kodang asenok bilemba ama Tsüngremi mapa meinyaklir, kodang asenok mapang metsükteplir, asenoki kechi inyaktsüla? Pa dang pelaang, Pa meimang aser Pa tushiang. Mapang atema Pa tebilemtsü südakjang. Tsüngremi teti mapa ajak tajung asoshi inyaker (Rom 8:28). Saka Pa takok jungkai adoktsütsü asoshi mapang shidakji ataa alir. Pai anü tetsüji reprangdakjang.
Tsüngremi menubaji ne jakla yangluba yim nung shilem ka lir. Tanabuba mapangji Tsüngremi na manidaktsür, Pai kodanga na asoshi mapa inyakba manener ta bilemteta tasü itang, aser Pai kodang koda na yaritsü metetta lir. Pa mapang nem aser Pai anebaluba nem bendanga agüjang.