Imchalu nung angoh mesüba tetoktepba ayonger

Mokokchung, May 10 (TYO): May 14 Honibarnü, Mejungkaba’r angoh tzübo Imchalu nung angoh  mesüba (angling) tetoktepba sentong ka alitsü ayongzüka lir, ta osang ka ajanga metetdaktsü. Mejungkabar angoh tzüboji Mokokchung nungi kilometer 15 shi pilar Imchalu nungto lir.
Iba tetoktepba nung angoh tulutiba poteter (biggest catch) ana nem senpet sen 10,000/- (1st prize) aser 5,000/- (2nd prize) agütsütsü. Angoh mesütsü atema mapangji anepdang 8:00 ako nungi nikong 4:00 ako tashi dang melatsü.
Nisung shia tenüng züluokba (registration fee) sen 700/- agitsü aser angoh mesüba fish hook ana melatsü. Anungji, iba tetoktepba nung tejangrar ajaki shilem agitsü lapoktsür, ta kasa osang nungsa metetdaktsü.
Iba angoh tzübo anasaji süngo aser chiyungtsü tatsük talem angutsü aser iba tzübo tashiji gari tila dena senzütettsüsa lenmang kanga junga lir, ta osang ajanga angazüker.
Angoh mesünertem atema osang tajung kaji; May 10 nungi tenzüka tan May ita piyong (anogoshia) angoh mesütsü mapang lapoktsütsü. Tejangrartemi osang tejangja agiteptsü asoshi iba mobile number (9862143296) nung tongteprateptsü akok.