IMCT-i Kohima nung anentsüh aluba tesemtem semdanga asadang

Kohima, Rongjui/September 06 (TYO): Tanü Inter-Ministerial Central Team (IMCT) kati tawa tzüngluruwa mongpu nung anentsüh agi Kohima jila nung teraksatsüba tesemtem aser raksatsüba kitem semdanga liasü, ta ketdangsertem osang ka ajanga metetdaktsü.
Iba team nung züngsemtemji K. B. Singh, Joint Secretary (FFR), MHA leniba nung R. B. Kaul, Consultant (FCD) Department of Expenditure, New Delhi aser Chahat Singh, Department of Rural Development, New Delhi nunger liasü.
Kohima DC, Rajesh Soundararajan leniba nung district administration, NSDMA, DDMA aser tim departments nungi ketdangsertemi IMCT teamji meina liasü. Iba mapang nung ketdangsertemi team dang kiojen, gari lenmang, tzülu aser ango tzübo raksaba osang metetdaktsü.
IMCT team-i Keziekie, Lerie nung aliba KMC Solid Waste Management site, Para Medical colony, Daklane, Old KMC dumping site, NH-29, Naga Hospital, Soul Harvest church, Pezielietsie, Perizie, Sanuorü, Nhachükhu aser Keyakie semdanga teraksatsübatem asadangogo.