IMCT Team-i Kohima aser Phek district na nung anentsüh aluba tesemtem semdang

Kohima, Rongjui/September 06 (TYO): Tanü Central sorkar nungi Director In-charge, Department of Agriculture & Cooperation, Kolkata, Dr. K. Manoharan aser Ministry of Road Transport & Highway, Guwahati, Anirban Acharyya na leniba nung Inter-Ministerial Central Team (IMCT)-i Kohima aser Phek district na nung anentsüh agi kongshiba tesemtem semdangogo, ta tanü ketdangsertem osang ka ajanga metetdaktsü.
Parnoki semdangba nükjidongji tesüiba hopta ishika state nung tzünglu maneni aruba ajanga teraksatsübatem asadangtsü atema liasü.
Team-i Varii aser Phesama nung anentsüh aluba tesem dena semdang, kong kibong 32 shi takoksa ngua liasü. Iba sülen parnoki Viswema, Kidima aser Zuketsa lenmangleni oa anentsüh tulu aluba tesemtem semdang.
Iba sülen team ji Sidzii ayong apui ao aser temeket nung RD Block, Kikruma kübok nung anentsüh aluba ajanga ayong nung tzü tepdanga aliba tesem semdang.
Parnok meyipa arudang parnoki Mima aser Kigwema yim na nung anentsüh aluba aser alu nung aonsotsü raksaba semdang.
IMCT team ji Road & Bridges, Agriculture, I&FC, Soil & Water Conservation, Fisheries, Horticulture, Rural Development, IPR, Sericulture department tem nungi ketdangsertem, District Administration aser Police-i meina liasü, ta kasa osang ajangasa metetdaktsü.