IMDH Mokokchung nung Digital X-Ray Machine amenokogo

Dimapur, September 22 (TYO) : Imkongliba Memorial District Hospital, Mokokchung nung Digital X-Ray Machine amenoka ajanga Mokokchung aser temeket aliba district tem – Tuensang, Longleng, Zunheboto aser Wokha kübok shilem kar nungi shirangertem teyari tulu angutsü imlar.
Mongulbarnü Ao Senden, Ao Kaketshir Mungdang, Watsü Mungdang, Mokokchung Town Lanur Telongjem aser IMDH o District TB Hospital Mokokchung nungi doctor aser staff den lia Mokokchung deputy commissioner, Sushil Kumar Patel IAS-i Digital X-Ray machine sayatsü.
Tanü amenokba machine ji IMDH nung Doctors Forum-i acha-ayanga Welfare Fund nung sen lakh 10 shi endoka aliba lir.
Tanü agiba sentong nung DC aser District health Society mendenbuba, Sushil Kumar-i Doctors Forum IMDH nem tenüngsang agütsü.
Mokokchung medical otsü nung iba ya alizüng tulu ka tongtetba lir aser maneni nübortemi mozüki ajungkettsü atema pei akokba tashi yaritepang, ta Mokokchung DC-isa ayongzük.
Tanü Ao Senden tir, Imolemba Jamir-ia o jembidang, civil society-i IMDH yaritsü atema mapatong ka ka danga inyaktsüla ta ayongzük.
Sorkar dak dang metaloker aliba ajanga nüngdak ajak meperitsü aser khenkhenbo yimsüsür kati pai jembizüka yokba memetet akümer, ta Ao Senden tirisa ashi.
Imolemba Jamir-isa IMDH Mokokchung nung paan aser moko achiba inyakyim noktanger ta tanü metetdaktsü.
“Mozü kidangi arurtemi yimya tajung benshitsüla. Mozüki merükmejua ayutsü atema police tem mapa lemzüktsütsüla aser parnoki ozüng alema inyakertem mita repranger senchi achitsüla. Iba tenokdangba ketdang asütsü atema Deputy Commissioner nem mapa nungloktsür” ta paisa shisem.
Iba atema Deputy Commissioner-i ashiba agi, pai Superintendent of Police, Mokokchung den jembitepba sülen tenokdangba agütsütsü aser senchi nungi aruba senji Welfare Fund dangi yoktsü.
‘IMDH ya ajak meyong lir’ ta MTLT tir Imkummeren Jamir-i ashi aser paisa doctor aser staff dang tali bendanga agütsüshir inyaktsü ayongzük.
Menden temaba nung aliba ketdangsertemi IMDH indang khurettem atema ola adokba angashia mapa inyaktsü atema hospital ketdangsertem aser civil society longjemer mapa inyak nung ajungtsü, ta MTLT tirisa tebilemba lemsatep.
AKM tatong tir, Akummeren Longchar-i ashiba agi, AKM dena civil society teloktemi IMDH jenjang ajungkettsü atema mapa inyaka arur saka iba agidangbo meperir.
“Asenok nübortem nem iba onük meteta lidaktsütsü atema inyaktsüla” ta paisa shisem.
Tanü agiba sentong nung mendenji Medical Superintendent, IMDH, Dr. Medem liasü aser pai ashiba agi Ministry of Health and family Welfare, Government of India kübok National Health Systems Resource Centre, New Delhi ajanga IMDH ya “model district hospital in Nagaland” shimogo.
Tanü amenokba Digital X-Ray Machine ya Welfare Fund nungi aliba lir aser sorkari itasen aser allowance agütsüba dak alaka tanga budget kecha melemzüktsür, ta Dr. Medem-isa metetdaktsü.
Sentong nung Doctors Forum IMDH convenor, Dr. Moa Jamir-i IMDH Welfare Fund indang osang tatsü agi metetdaktsü.