IMDH nung cancer agi shiranger timtemer 3 nem teyari agütsü

IMDH nung cancer tashidak agi shiranger timtemer nem MAAM cancer trust fund ajanga teyari agütsüba sentong ka IDSP Hall IMDH nung alidang tetushi tejaoker Mokokchung ADC Rajesh IAS den teyari angurtem, MAAM züngsem aser sentong nung shilem agirtem külemi tangokba noksa nung angur. Mokokchung, March 12, 2016

Mokokchung, March 12 (TYO): Mokokchung Arts & Aesthetics Management (MAAM) teloki tentetba MAAM Cancer Trust Fund senpong nungi taküma Dr. Imkongliba Memorial District Hospital (IMDH) Mokokchung nung cancer tashidak agi shiranga amunger koda masür parnok asem nem teyari sen terara agütsüogo.
Tanü iba teyari agütsüba sentong ka yangi IDSP Hall nung alidang tetushi tejaoker Mokokchung ADC, Rajesh Soundararajan (IAS) den IMDH Medical Superintendent Dr. Medem, Miss Nagaland 2015 2nd Runner-up Yangerjungla Pongen, Miss Mokokchung 2015 Ayusangla Jamir, Mokokchung Town Baptist Arogo (MTBA) Assoc. Pastor Bendang nungertemi shilem agia liasü.
Tetushi tesemdanger Rajesh IAS-i mapang tatsüka agidang, MAAM teloki iba ama cancer tashidak agi shiranger timtemertem yariba ngua parnoki tema tobur ajungba maparen nung dang masü saka telung tebor (inner beauty) ajungba nunga shilem agiba jungkai adokogo ta ashi. “Atangji, ibai meimchir nela dak kongshiba maparen tajung ka lir”, ta paisa shisem.
Tang state nung mozüki tipdema kanga junga bener aoba rongnung IMDH ya tajungtiba asütsü, anungji, yangi inyaker ajak dang pelar, iba mapa tajungji teti bener aotsü paisa ayongzüka ashi.
MAAM-i iba cancer trust fund ya 2014 October 10 nü tenzüka IMDH nung cancer tashidak agi shiranger timtemba pur yaritsü nükjidong yur tanü tashi kasa teyari mapa inyaka arudaki.
Asür Mongtishilu shiba arishi küm 21 nung bone cancer agi asü, pa nüngtem par tsürabur aser kinüngertemi MAAM cancer trust fund nung yariteptsü asoshi sen lakh ka tenla agütsü. Asür Dr. Talitemsü (Oncologist) shibai iba cancer trust fund tenzükba mapa nung tongti shilem agia liasü, par kinüngertemia 10,000/- tenla agütsü. Tetenlar ajak dang MAAM-i pelaba metetdaktsü.