IMDH nung surgery takok ngua agi

Dimapur, July 27 (TYO): Bodbarnü Imkongliba Memorial District Hospital (IMDH), Mokokchung nung Total Hip Replacement (THR) surgery ka takok ngua agiogo.
Orthopedic Surgeon Dr. Martsuden-i aniba surgery team jagi arishi küm 41 tain tebur ka dak IMDH nung tang mezüngbuba atema iba surgery ji agia liasü, ta Medical Superintendent IMDH, Dr. Medem-i ashi.
Surgery team nung doctor 4 aser technician o nurse tem dena liasü aser parnoki surgery tulu takok ngua agiba atema kanga pelar, ta Medical Superintendent IMDH-isa ashi.
Surgery agisangji arishi küm 7 asüdang nungi Arthritis Hip timtem adok aser operation agiba pa tetsüng achijiji inch 3 shi kati tatsüba aküm, ta Dr. Martsuden-i ashi.
Küm 34 tashi iba timtemji bener aruba sülen pai surgery agitsü mulungtet aser takok ngua agiogo, ta paisa metetdaktsü.
Dr. Martsuden-isa ashiba agi, surgery ji ghonda 3 ser tesadang shi ka agi aser iba nung shilem agir doctor, nurse aser technician ajak dang kanga pelar.
Medical Superintendent IMDH, Dr. Medem-i teyari agüja nungitba ajanga par teloki iba sugery tulu agitsü telemtetba aser iba atema Dr. Medem dang kanga pelar, ta Dr. Martsuden-isa shisem.