Imkong L Imchen-i National Electronic Media aitsür

Dimapur, June 11 (TYO): Nagaland Chief Minister, Dr. Shürhozelie Liezietsu-i NSCN(K) Chairman, S S Khaplang asüba atema asükhu lemsatepba osang sangoktsüba nung Electronic Media-i tim mesüi belenshiba atema sasa bilemer, ta Imkong L Imchen-i tanü metetdaktsü.
Nagaland Forest, Environment & Climate Change Minister aser Cabinet Committee on Political Mission züngsem, Imkong-i Chief Minister-i ashiba o ajak pusema nungiter, ta sangdong ka nung ashi.
“Dr. Shürhozelie’er cabinet nung ni Minister ka asüba atema masü saka Naga senso ka ama tebilemtsü bena, ni Chief Minister indang o pusemer aser National Electronic Media-i iba sangdong anema nokdakbaji ni mangateter,” ta Imkong-i ashi.
India nung Fourth Estate ji kanga dang tongtipang lir aser linük yangerba nung shilem tulu agir. Anungji, parnoki tetsübu melii aser shinga tsütsü mesüi, osang shitak proktsüla, ta paisa shisem.
“Ajisüaka, National Electronic Media-i Chief Minister Dr. Shürhozelie-i asür SS Khaplang asüba atema asükhu lemsatepba sangdong anema ola adokba angudang, ni mepelar aser item media nisungtem jagi Linük tenzüktsü atema masü saka tanga miim tebilemba kar yur mapa inyaker ama nibo bilemer” ta paisa sangdong nung shia lir.
Nagaland state nung Dr. Shürhozelie ya Regional politic tenzüker rongnung ka lir ta ajaki meteta lir. India nung regionalist politician ji pa dang masü saka state aika nung pa ama regional politician aika lir.
“Dr. Shürhozelie ama lennir ka dak tai tongloktsüba lanurtemji shirnok’ar ni metetnür. Nenoki English mesüra journalistic oshitembo kanga junga meteta alitsü akok saka nenoki politics memetet. Nenoki osang mashileni prokshiba ajanga linük mashileni anisar, anungji nenok dang Fourth Estate community/fraternity züngsemtem ta ajatsü malang” ta Imkong L Imchen-isa metetdaktsü.
“Media nisung ajak dak tai tongloktsür masü saka Naga yimten tebilemtsü mashileni meyipsa prokshiba media nisungtem dang iba olen sangoktsür” ta paisa shisem.