Imkong L Imchen NPF züngsem nungi anentsü

Kohima, April 14 (TYO): Tang nungi telemtetba ka memetetdaktsü tashi Naga People’s Front temzüng arla V section 9 den arla XIV nung shia aliba tashi amshia Wb.Imkong L Imchen, MLA, Naga People’s Front telok nung active aser primary züngsem nungi anentsür ta NPF tir Wb. Dr. Shürhozelie Liezietsu-i metetdaktsüogo.
Tanü iba osang metetdaktsüba sangdong nung, NPF tiri ashiba agi, Wb.Imkong L. Imchen-i NPF telok nungi pasasa anener ama NPF telok anema inyakbaji kechiba inyaker ta kuli meshia tasüngdangba shidi ka 15.2.2016 anogo nung agütsü. Iba sülen pai iba shidi langzüa 19.2.2016 anogo nung agütsüba nung taginüba onük kecha medeni party dang aija zülu ta NPF tirisa metetdaktsü.
Ibayongji, March 3, 2016 nü NPF Disciplinary Action Committee senden mena jungjunga ken o lemteper, Wb. Imkong L. Imchen-ji NPF party nung primary aser active membership na prongla nungi ”suspend’ sütsütsüla ta telemtetba agütsü.
Iba telemtetba nungji ajemdaker NPF temzüng nung shia aliba ama NPF tir-i paji telok züngsem nungi anentsüogo.
NPF tirisa ashiba agi, NPF rongnungsa nisung kari timtem agütsüba ken o benokba nung Election Commission-i March 27, 2015 anogo nung obendang agütsüba ama 30.4.2015 anogo nung I.G.Stadium, Kohima nung NPF lokti senden lia lemtetba nung ajemdaker,NPF purtem ronngnung putepshitsüba mapa inyakogo aser ano maneni inyakdagi, ajisüaka taoba mapang tatsüka tsüngda Wb.Imkong L Imcheni inyakba mapatem agi putepshitsü inyakbaren nung timtem kanga agütsüogo.
Taoba küm NPF tatar yimsüsürtem rongnung Chief minister, T.R.Zeliang melennür kar adok saka memelentet. Iba mapang nungi tenzüka NPF tatartem rongnung mulungmechitep tenzüka lir. Iba maparen nung meputeptet tang NPF tiri MLA Imkong L Imchen NPF züngsem nung anentsür asütsü.