Imkongliba Memorial District Hospital nung morgue yanglutsü

Dimapur, October 30 (TYO) : Imkongliba Memorial District Hospital (IMDH) Mokokchung nung morgue den embalming facility yanglutsü ta Health & Family Welfare Minister, P. Longon-i metetdaktsü.

Morgue nung tasümangtem ayuba dang masü saka post mortem agiba nung teyari tulu angutsü, ta pai ashi.

October 30, 2015 nü IMDH conference hall nung Minister-i department officers aser staff den ajurutepa senden ka alidang iba osang metetdaktsü.

Mokokchung district administration aser senior departmental officers-i district nung morgue ka nüngdaker ta tebilemba metetdaktsüba sülen Health & Family Welfare Minister-i morgue yanglutsü osang metetdaktsü.

Iba senden agiba sülen osangbener den sensaksemdang Minister-i ashiba agi iba ya 2016-17 financial year nung yanglutsü.

Health & Family Welfare Principal Director, Dr. Nandira-ia ashiba agi, iba morgue yanglutsüba atema teinyaktsü aika lir saka iba yagi Mokokchung district dang masü saka anameta aliba district tem ajangzüktsü.

Sentong nung mendenji CMO, Mokokchung, Dr. Akaba liasü, Commissioner & Secretary, H&FW M. Patton aser Principal Director, H&FW, Dr. Nandira nati o tatsütsü jembi aser Dr. Medem, MS, IMDH-i anküp tepela o jembi.

Minister P. Longon-i IMDH tonga aruba sülen H &FW Commissioner & Secretary, Principal Secretary aser senior officers nunger den IMDH nung aliba ward ajak sema senzü aser shirangertem den ajurutepa sensaksem.

October 29 nü P. Longon Mokokchung semdangi aru aser pai CMO Office under construction, CMO Official quarter, Impur Christian Hospital, T.B Hospital aser Nurses Hostel of IMDH nungertem semdang.