Imlaba ama Modi-i aniba sorkari meinyaker ta aikati bilemer: Survey

New Delhi, Monupii/May 14 (Agencies): Tesüiba küm pezü tsüngda Ato kilonser, Narendra Modi-i aniba sorkari aluyimertem tebilemtsü onük, mapa adokdaktsüba aser osettsüset nung jenjang atuba atema junga meinyaktet ta nisung aikati bilemer, ta online survey ka ajanga bushitetogo.
Community social media platform, LocalCircles-i iba survey agia liasü, aser parnoki ashiba agi, iba poll nung shilem agir shilem 43-i, imlaba ama sorkari meinyak ta langzü, shilem 29-i sorkari item atema inyakdar ta ashi aser shilem 28-i dang sorkari imlaba dang nungi tajungba inyakdar, ta langzüa liasü.
Iba survey nung linük nung district 250 nungi senso 62,000-i shilem agia liasü, aser parnok rongnung shilem 35 bo tetsürtem liasü.
LocalCircles-i ashiba agi, iba survey nung telangzüba agutsürji portal nungji register süa lir aser parnok aikati pei talidak tesem osang lemsatepa lir.
Shilem agia telangzüba agutsürtemi tetsür aser tanurtem anema inyakba mapatem atema sorkari junga meinyakba, mapa madokdaktsütetba, aluyimertem atema junga meinyakba, osettsüset jenjang mazüoktetba aser healthcare jenjang dalang agi magütsüba lemsatepa liasü.
Ajisüaka alima jenjang nung India nüngtugu akumba, Pakistan anema junga inyakba, kiralongra anema junga raraba aser infrastructure terenloktem agibo telangzür aikati melungsüa liasü.
Survey ajanga ashiba agi, “Shilem 60-ibo osettsüset/aonsotsütem nung jenjang majem ama bilemer. Shilem 33-i dang tesüiba küm pezü tsüngda osettsüset/aonsotsütem nung jenjang aluogo ta bilemer.”
Shilem agi 46-i India nung shishilembatsü atema tang tezübaba kümogo ta bilemer ajisüaka shilen 39-ibo yamaji masü ta langzü.
Telangzür shilem 49-i India nung ochimashi ajema maküm ta langzü saka shilem 44-ibo ochimashi ajema kümogo, ta langzü.