Imliakum Aier-i ‘Dimapur’ ken sayaogo

Dimapur, Aami/June 05 (TYO): Nagaland nungi kentener aser ken mejemer Imliakum Aier mapang talangka kijai atenba ken meteni lia arur ‘Dimapur’ ta sür ken ka sayaogo, koba pa takum melenshitsüba yimti tushia atenba alitsü.

Iba ken ya pai solo EP küm tatemlen sayatsü aliba nung ka asütsü.

Imliakum Aier ya Nagaland nung ken mejemer tejen nisung ka ama züngshir aser pai otsü keta ken mejema sobaliba kensü meyoktepa atenba ajanga nüburtemi tali jangja meteta lir.

Pai taoba mapang The Message From The Hills aser Dancing in the Capital amala ken sayaa lir.

Iba ken indang jembidang, pa takum aser kentenba nung yimti ya tiyong sür aruba asoshi tenüngsang agüja Dimapur ken ya mejem, ta ashi.

“Dimapur ya kü nem nüngdakba ajak agütsüba yimti indang ken lir. Iba yimti yagi ni yanglutsü, raksatsü, ayongzük, aser tatem nung kü indang maitsü nung shilem ka ama akum,” ta pai ashi.

Pai New York, Paris aser California ama kentener temi yimti balala indang ken atenba angaa intet aser paia künü anogo par yimti asoshi ken mejemtsü bilema liasü ta ashi.

“Iba ken ya kü yimya nung Dimapur tushiba lir, alima nem angadaktsütsü atema kisüng masü, saka iba yimti nung sendaktepa alir ajunga asoshi lir. Nisung shinga memelenshi Dimapur yutsür maor alitsü ta ni bilemer,” ta pai ashi.

Dimapur ken ya video dena lir, kong tensa balala ajangshiba indang pai sayur.