Imlibenla Wati-i la zünga aliba Model Higher Secondary school semdang

Kr. Imlibenla. Wati-i la school azüngdang asemba uniform semer tesüiba mapang la zünga aliba, Model Higher Secondary School semdangdang o jembiba noksa nung angur. (Photo: Toshi Kichu)

Dimapur, October 7 (TYO) : Tanep, October 7, 2016 nung Naga nunger ajaki meimla, Imlibenla Wati-i tesüiba mapng la zünga aliba school nem akhümtsübu agütsütsü atema school-i aru. Lai la 2009 nungi 2014 tashi azüngdang HSSLC examination nung takok anguba, Model Higher Secondary School semdang.
2012 küm la class 11 nung aliba mapang lar medemtsür kari beauty contest nung tokteptsü ajungshi aser iba küm la Miss Mokokchung runner up angu. Iba kümjisa lai ano Miss Nagaland koranga angu.
Imlibenla Wati-i school semdangdang la indang school uniform semer aoba ajanga tesentepertem, talisa school nung azüngertem kanga pelatep.
School uniform sobur kaket reju nung oa angazükbaji tesüngmangtsü maongka aser temoatsü tulu ama züngshitsüla, kechiba süra tanur aika tsüraburi kaket rejui aotsü memelar aser karbo sen maliba agi school-i moteti lir, ta lai o jembiba mapang ashi.
Kaketshiretm dang lai, asenok uniform agi jangjadaktsür anungji ajaki uniform akhümtsübua aser anepalua amshitsüla, ta ashi.
Na tekolok techira masüyonga mesüra school tajungtiba nung mezüngaka taküm nung takok angutsüji nü temulungtetba aser nendaka inyakba dak keta lir. Anungji kaketshirtemi nükla tajung ayutsü nüngdak, ta Imlibenlai kaketshirtem ajungshi.
Ni international sabang nung oa India tenüng nungi toktepdang nenoki maneni nungitangma, ta lai tesentepertem dang ashi.
Imlibenla Wati ya taküm November ita South Korea nung akatsü aliba, Miss Asia Pacific Super Talent tetoktepba nung India tenüng nung shilem agitsüba lir.
“Big Break Entertainment India nung CEO Anil Sharma-i kü dak kanga tamang kaa aser temulung lema iba sabang tulu nung shilem agitsü maongka agütsüba atema kanga pelar,” ta lai ashi.
School Headmaster, Yutsung Imchen-i, “Nai mapang agütsüteta school semdangba atema pelar aser ano tarutsü mapangtem nunga yamai semdangtsü imlar. Nai inyakba ajak nung takok angutsü onok sarasadem,” ta la dang ashi.
Pai, “La ya school atema senti long tajung ka amai liasü aser onoki la teti bilemtettsü,” ta shisem.