Imlibenla Wati-i medical camp ka ayonga katsü

Noksa nung Imlibenla den Jail ketdangsertem, Doctor aser pa den külemi inyakertem angur  (Noksa tangoker – Toshi Kichu)

Dimapur, May 28 (TYO) : Taoba mapang Miss Nagaland aser tang Miss World Beauty Queen India Imlibenla Wati-i “Beauty with a purpose” omen nung ajemdaker Mokokchung district jail semdanga tepuokdak alirtem nem angadi medical camp ka ayonga katsüogo.
Tepuokdak alirtem den mapang tatsüka agia sensak asemba mapang tourism & humanity ambassador, Miss Imlibenlai, ni iba camp ayongba ya nenoki ni nungitba atema pelaba temaitsü lir, ta ashi.
Nisung ka taküm liyonga aodang ajaki aibelener anungji nenok teimla mesamatsüla aser tang yangi aliba mapang pei taküm khen jungjunga meyipa reprandanger Tsüngrem nem taküm bendanga agütsür tarutsü nükla tajung ayutsü merangang, ta lai tepuokdak alirtem ajungshi.
Imlibenla-i, “District jail ketdangsertemi iba tesem kanga merüka ayuba atema tenüngsang agütsür aser ano NGO temia tepuokdak alirtem temang aser tanela tsütsü temelenshi angutsü atema maneni nungita sarasademtsü nung kanga ajungtsü, ta osangbenertem den jembiba mapang ashi.
Imlibenlai parnok atema mapa tajung inyaktsüba pelaba temaitsü tepuokdak alirtemi, parnoki anepalua intetdaktsüba süngojok packet ishika la nem agütsü.
Dr. Takarenba Pongen-i anir iba camp nung parnok tepuokdak alir ajak agi nisung 30 temang tendangogo aser district jail ketdangsertemi acha ayanga parnok nem mozü angadi lemtsü.