Imlibenla Wati-i Miss World Beauty lndia korang nguogo

(Tabelen nungi tachiji) Imlibenla Wati (Nagaland) Miss World Beauty India, Divya Saini (Punjab) Miss Supermodel International aser Sofia Singh (Delhi) Miss Eco Beauty India nunger külemi tangokba noksa ka yangi angur.

Delhi, October 9 (Agencies): Tan Delhi nung kanga wangshia amungba tobur tajungtila toktepa sentong nung, finalist 25 rongnungi Miss Nagaland 2013, lmlibenla Wati-i Miss World Beauty lndia, 2015 korang nguogo aser South Korea nung akatsü aliba Miss World Beauty lnternational nung lai India tenüng nung shilem agitsü, ta Beauty & Aesthetics Society of Nagaland (BASN) sangdong ka ajanga metetdaktsü.
Iba tetoktepba metenzük tsüngda Imlibenla Wati-i, “Iba tetoktepba ya kanga temelabo masütsü,” ta shia liasü, ajisüaka Mokokchung nungi tobur tajungtilai, la dak aliba sempet ajak agi bendanga agüja iba tetoktepba nung shilem agiba ajanga iba takok tulu ngutetogo.
Kasa sangdong nungsa, tan lai iba takok anguba ya linük nung ‘National Pageant’ sentong nung Nagaland nungi mezüng takok angur asütsü aser linük tenüng nung ‘lnternational Pageant’ nunga state nungi mezüng shilem agitsü shimteter asütsü. Iba takok den külemi ano lai Miss Congeniality Title-a ngua liasü, ta shia lir.
Miss lndia Elite sentong ayonger Ru-Ba-Ru ya kanga dang sempet tulu aliba telok lir aser parnoki tajungtiba rongnung tajungba asütsü meranga sentong tulu ayonga kanga tobur junga amunger. Miss lndia Elite ya tobur ajung toktepba sentong ka lir aser iba ya ajanga tanur tepok nung lia tettsür süra raksaa endokba anendaktsütsü asoshi yimyim ayimoktsür.
Sentong nung Punjab nungi Divya Saini-i Miss Supermodel International 2015 korang angu aser Delhi nungi Sophia Singh-i Miss Eco Beauty lndia 2015 korang ngua liasü.
BASN-i iba takok korang anguba asoshi lmlibenla Wati nem tenüngsang agütsüogo aser lai tangar den tasü ita toktepa takok tulu angba ajanga state nung aliba lanurtem tali ajungmesor, ta ashi.
Imlibenla-i takok anguba sülen Tsüngrem nem konang aser tetsüshi agütsü.