Immanuel College nung Yellow line Tobacco free campaign amenokogo

Dimapur, Tsüklai/February 14 (TYO): Tobacco free institutions atema Yellow line Tobacco free campaign, Immanuel College nung February 14 nü amenokogo. Dr C Tetseo-i ashiba agi, iba campaign nükjidongji Tobacco free institution inyakyim akangshitsü aser iba den kaketshirtem, staff aser institution semdanger nem tekümdangtsü tali jangjaa metetdaktsütsü asoshi lir.
Iba campaign kübok school aser college nungi lemang anatsülen meter noklangka yellow line ka nung “Tobacco free zone” ta zülur toktsütsü. Iba yellow line kübok nisung shingaia moko agi yangluba oset ayoktsü aser achitsü memelatsü.
Dr Tetseo-isa ashiba agi, iba campaign ajanga Dimapur district nung Tobacco free institutions ajak ayimjema inyaktsü aser iba sülen tanga district tem nunga amenokyonga aotsü.
Sentong nung o jembidang Dr Tetseo-i ashiba agi, moko achiba ya temang nung timtem agütsüba dak dang sendaka mali saka tzümopung aser civic sense daka sendaka lir. Paisa Talab aser Tulsi terep aser metsü ajanga jila kanga mejungi menentsür ta ashiba den kaketshirtem dang nüburtem yimya melenshidaktsütsü asoshi mapa agi inyaka sayur kaka akümtsü ajungshi. Paisa Tobacco free institutions ajak dang iba campaign takok asoshi teka amteper inyaktsü ajungshi.