Imna Along-i BJP worker dang nübur tenzüktsü ajungshi

Dimapur, Metsüremi/March 13 (TYO): Nagaland state BJP tir, Temjen Imna Along Longkumeri Mokokchung nung BJP worker dang ajemalushir nübur ajangzüktsü asoshi inyaktsü ajungshi aser India nung Bharatiya Janata Party ya linük nung tashi-temeden monguteti aliba nüburtem ajungkettsü asoshi lir, ta Brehostibarnü ashi.
Imna Along Longkumer, shiba Nagaland nung Higher & Technical Education aser Tribal Affairs minister lir, pai ashiba agi, nüburtem temaba jenjangi ajungkettsü ya BJP indang nükjidong taroktiba lir, anungji Mokokchung district nung BJP lenirtemi nükla ka yur nübur tenzüktsüla.
Party-i loktiliba nung teküboktiba jenjang tashi nung terenlok bener asoshi party nung inyaker aser lenirtemi kati ka nungita yaritepa ajungshiteptsüla, ta pai nenshia ajungshi.
India Ato Kilonser Narendra Modi-i yimtsüng aser rural areas nung nüburtem ajangzüktsü nükjidong nung Ayushman Bharat Yojana aser Pradhan Mantri Jan Arogya Yojna amala central scheme balala tenzükba indanga pai ashi.
Nagaland tepour junga, yimchiyimjung aser nüburtem temeden shidak amshia litetba state ka akümtsü mangdang penzüa jembiba mapang Imna Along-i Mokokchung nung BJP lenirtem dang tangatetba aliba lenir ka asütsü aser terenemshiba nung nübur tenzüktsü ajungshi.
Paisa BJP Mokokchung district indang tir tasenba, Imolemba Jamir-i anir party temaba jenjangi aniba asoshi tenüngsang agütsü aser pai anir Mokokchung nung office building yanglushiba asoshiba aser bendanga agüja party tenzükba atema tenüngsang agütsü.
Iba sentong nung Mokokchung district BJP tir Imolemba Jamir-i tarur pela agizükba o jembiba mapang BJP ya national party ka lir, kobai linük nung yimjung aser terenlok asoshi inyaker, ta shia liasü.
Pai party kübok kongsang balala (morcha) inyakyim indang ashi aser kasa mapang party tir dang party nung tentet balala nem kasa temulung agütsütsü ajungshi.
Paisa Nagaland state BJP tir Imna Along lenisüba nung tamang akaba ashi aser pa lenisüba kübok BJP tashi taitba akümtsü imlaba lemsatep.
Iba sentong nung assembly constituency balala nungi ketdangsertem dena liasü. Iba sentong ya BJP Mokokchung district, vice president, Nukshi I Ozukum menden sür agi aser vice president Watitemsu-i sarasadema liasü.